Nationwide ban sa pag-inom og bino sa mga

kadalanan, gimando ni Presidente Duterte

MANILA, Sept. 22 (PIA)--Gimando ni Presidente Rodrigo Duterte sa tanang mga lokal nga kagamhanan ug mga opisyal sa kapolisan ang pag-aresto sa mga masakpang mag-inom og bino sa mga kadalanan.

Kini isip parte sa kampanya sa gobyerno nga makab-ot ang kahusay ug kalinaw sa tibuok nasod.

Sa iyang mensahe atol sa ika-6 nga Mandatory Continuing Legal Education-Accredited National Convention of Public Attorneys ning bag-o lang sa Manila Hotel sa kaulohan, miingon ang Presidente nga ang mga tig-inom ang kasagarang mahimong arogante mao nga magresulta kini sa mga away nga magdala og kahasol ug kahadlok sa katawhan.

Giingong i-dili usab niya ang loitering o ang pagtambay mao nga gimando niya sa polisya ang pag-aresto sa mga molapas niini.

Matud pa ni Duterte, may Public Attorney’s Office (PAO) man nga motabang aron makagawas dayon ang mga maaresto nga dili mosunod sa iyang mando.

Ang pag-ban sa pag-inom sa kadalanan ang usa sa mga gipatuman ni Duterte niadtong mayor pa siya sa syudad sa Davao. (ecb/PIA7-Bohol)

================

LPA, magdala og ulan, 

baha sa Visayas

TAGBILARAN CITY, Sept. 22 (PIA)--Nipasidaan ang Philippine Atmospheric, Geophysical and Astronomical Service Administration (PAGASA) sa mga naa sa low lying areas sa Visayas.

Matud pa sa pinaka-ulahing weather update sa buhatan, katapusang nasigpatan ang low pressure area (LPA) sa gilay-ong 240 kilometro sa sidlakang bahin sa Catarman, Northern Samar.

Apil sa makasinati og pag-ulan dala sa LPA ug dayag usab sa flash flood ug landslide ang mga probinsiya sa Samar, Western Visayas ug Northern Palawan.

Samtang magdala usab kini og ulan ug isolated thunderstorms sa Bicol region, Mindanao ug nahabiling parte sa Visayas.

Nagpabilin usab ang posibilidad nga mahimong bagyo ang maong napormang dili maayong panahon. (ecb/PIA7-Bohol)

=================

Benepisyo sa ASEAN Integration,

gipasabot sa RADIO-7 convention 

TAGBILARAN CITY, Sept. 22 (PIA)--Gipasabot sa Department of Trade and Industry (DTI) ang mga benepisyo o kaayohan nga makuha nato sa Association of South East Asian Nations (ASEAN) Integration.

Atol sa pagbukas sa ika-23 nga Regional Association of Development Information Officers (RADIO) 7 convention niadtong Setyembre 18 sa dakbayan sa Dumagute nga gitambungan sa mga information officers ug tourism officers, gipasabot ni DTI Provincial Director Javier Fortunato Jr. nga dako ang benepisyo ug daghang mga oportunidad ang mahatag niini sa atong ekonomiya.

Matud pa ni Fortunato nga ang mga nasod nga naglangkob sa ASEAN adunay "communal arrangement" aron mas mapadali ang pag-proseso sa trabaho alang sa mga doktor, nurses, engineers, ug uban pa.

Ang maong arrangement nag-ila sa mga credentials sa mga propesyon ug gilibkas niini ang mga restriksyon aron maka-practice sila sa ilang propesyon sa mga miyembrong nasod sa ASEAN.

"Dako ang mahatag nga oportunidad ug mga benepisyo sa ASEAN ngadto sa mga small and medium enterprises (SMEs) tungod kay pagamyan usab ang mga taripa," pagbutyag pa ni Fortunato.

Tungod niini, mahimong kunhoran na ang presyo sa mga maayong kalidad sa mga produkto ug may kagawasan na kitang makapalit sa mga produktong ubos ang presyon apan maayo ang kalidad.

Kini tungod sa gilagdaang "Free Trade Act" sa mga miyembro sa ASEAN aron mas mapadali ang mga transaksiyon ug negosyo sa mga miyembrong nasod niini.

Tungod sa ASEAN Integration, gipaabot nga molambo pa ang ekonomiya sa Pilipinas. (ecb/PIA7-Bohol)

Si DTI Provincial Director Javier Fortunato Jr. mibutyag nga dako ang benepisyo ug daghang mga oportunidad ang mahatag sa ASEAN Integration atol sa pagbukas sa tulo ka adlaw nga RADIO-7 convention didto sa syudad sa Dumaguete niadtong Setyembre 18-21, 2017. (ecb/PIA7-Bohol)