Vintage sports carshow 

Motapnas na usab dinhi

BE GRAND PANGLAO, Bohol, September 25 (PIA)—Halos doble ang gidaghanon sa mga vintage cars ang makit-an sa mga Bol-anon sa pagbukas sa ika upat nga Tour de Cebu dinhi sa Bohol.

Gibutyag ni Sophie delos Santos, Pangulo sa Tradeshow International, ang nagpasiugda sa moving vintage car show nga gikan sa 28 ka karaang mga awto nga mitadlas sa mga kadalanan sa Bohol sa mi-aging tuig, 48 na ka awto ug mga tag-iya niini ang mipalanug sa ilang kasibut nga moapil sa tulo ka adlaw nga rally dinhi sa Bohol.

Ang Tour de Cebu usa ka lahing matang sa lumba, diin suwayan sa mga karaang awto nga gihimo niadtong 1972 paubos, unya gipahiuli, kon makalahutay ba kini sa kapin sa usa ka libo ka kilometros nga dagan subay sa mga kadalanan sa Bohol.

Ug inay magpa-unhanay sa finish line, ang lumba, dag-on sa kinsa ang makatabok sa finish line sa gikatakdang oras nga iyang iabut human sa kapin sa 300 ka kilometros matag adlaw, matud ni Pepon Marave, rally director sa Tour de Cebu, atul sa Press Conference didto sa Be Grand Hotel sa Panglao.

Kon ma-una pag-abut sa gikatakdang oras, makakuha ang driver og penalty, apil na usab kon ma-uwahi sa oras pag-abut, pasabut usab ni Charlie Cruz, Clerk of Course sa Tour de Cebu.

Matag adlaw, makakuha og penalties ang usa ka driver sa vintage sports car.

Ang labing dyutay nga penalties sa tulo ka adlaw nga suroy, maoy pili-on nga grand champion, pa-apas niya.

Ila kining gimugna tungod kay dili mga propesyonal nga racers kon dili mga gentlemen drivers ug tag-iya sa mga vintage sports cars ang mahimo ug buot sa mga tigpasiugda nga masinati usab sa mga drivers and nindot nga mga talan-awon, dugang ni Marave.

Una na nga gitumbok nga usa ka tourism event sa Bohol, ang Tour de Cebu, kalihukan nga gipasiugdahan sa Performance and Classic Enthusiasts (PACE) ug Manila Sports Car Club, agi og pagbukas sa car show, events ug paghatag sa kahigayunan sa mga tag-iyahan sa karaang sports cars sa pag-apil sa suroy.

Gibutyag ni delos Santos nga karong tuiga ang ika upat nga tuig sa Tour de Cebu, nga nakalibot na gikan sa Sugbo ngadto sa Dumaguete, Bacolod, San Carlos tabok sa Cebu ug sa katapusang duha ka tuig, dinhi himoa sa Bohol.

Ang nindot nga mga kadalanan sa Bohol maoy labing dako nga rason ngano nga gipili nila ang Bohol, dugang niya.

Magsugod ang Tour de Cebu sa Oktubre 20 gikan sa pantalan sa Tubigon human ikawas ang mga awto gikan sa FastCat, dayon subay sa highway paingon sa Loon, saka sa Catagbacan ngadto sa Sagbayan ug Danao diin didto may pitstop.

Molahus ang mga sakyanan ngadto sa Getafe, mopa-ingon sa Trinidad, Ubay, Guindulman, Jagna ngadto na sa Tagbilaran padung sa Be Grand sa Panglao.

Sa ikaduhang adlaw, gikan sa flag off sa Be Grand, mosubay ang mga sakyanan ngadto sa Jagna, saka sa Mayana paingon sa Sierra Bullones, Pilar, Alicia, Ubay, Trinidad, sulod sa interior road paingon sa Carmen, Sagbayan, Catigbi-an, Corella, Loboc dayun balik sa Panglao sa Oktubre 21

. 

Sa pagka Oktubre 22, adto sila paingon sa Balilihan subay sa Hanopol ngadto sa Batuan, Carmen unya sulod sa Sagbayan, Catigbi-an, subay sa Libertad paingon sa San Isidro, Antequera, Cortes, Balilihan, ngadto sa Loboc uli sa Panglao. (rahc/PIA-7/Bohol)

Tungod sa nindot nga agi-anan, maabiabihon nga mga tawo ug piskay nga talan-awon, mobalik ang 48 ka mga karaang awtong panngukod aron mosuroy dinhi sa Bohol sa sunod buwan. Ang kalihukan gitan-aw na nga makadugang sa turismo nga aghat sa Bohol. (rahc/PIA-7/Bohol)