Outreach Mission sa Clarin

Gitapok-an sa katawhan

CLARIN, Bohol, September 25 (PIA)—Gatosan ka molupyo sa Clarin ang milugsong sa Poblacion aron magtumod sa ilang mga abut samtang masubay sa hanay alang sa libre nga serbisyo, tambag, kasayuran og mga panghatag atul sa Outreach Mission nga gipangunahan sa mga opisyales ug sa kagamhanan sa Bohol, Septembre 25

Kini samtang duha ka dagko nga kalihukan ang gihimo sa nataran sa munisipyo sa lungsod sa Clarin: ang Outreach Mission nga giangkon usab sa mga misalmot nga mao kadtto ang HEAT Caravan ug ang gikahinamang tinuig nga Agro-Industrial Fair nga gisalmotan sa tanang barangay sa lungsod.

Libre nga medical ug dental services, masahe, serbisyo sa paglimpyo sa lawas o hygiene, one stop show sa negosyo, libreng binhi, mga semilya sa isda, liso, pagkat-on sa dugang abilidad, tambag panghayupan, pananum, backyard gardening, ug daghan pang serbisyo nga adto ra unta mahuka sa mga buhatan sa Tagbilaran.

Mikabat sa 29 ka barangay ang Clarin, ang tanan niini nalangkob dihang gibukotan ang lungsod sa state of calamity dala sa pagkatapnas sa mga sakop sa teroristang Abu Sayyaf nga mitago sa nahisgutang lungsod niadtong Abril.

Apan sa 29 ka barangays, 13 lamang niini ang direktang gihulga sa kakuyaw sa sinukli-ay sa bala tali sa mga kasundalohan ug kapolisan batok sa mga bandidong teroristang Muslim.

Tuyo sa Outreach Mission ang pagserbisyo niadtong mga molupyo sa 13 ka barangay nga direktang apektado sa kakuyaw, apan gipaambit usab ang kinatibuk-ang mga katawhan nga nanganaug sa sentro aron moapil sa duh aka kalihukan.

Samtang mipila ang kapin sa us aka libo ka tawo alang sa goodies nga gipanghatag, gipaklaro ni Clarin mayor Allen Ray Piezas nga gihimo nila nga prayoridad sa pag-abag nga hatag ang kadtong mga mas nanginahanglan ilabi na gikan sa 13 ka mga barangay sa lungsod.

Ang 13 halos katunga sa 29 nga kinatibuk-ang kabarangayan sa lungsod nga nahulga sa kawaad-on ug sa milabay nga panagbangi sa mga terorista ug mga alagad sa balaod.

Sa wala pa kasugdi ang Outreach Mission, mitaho si Mayor Allen Ray Piezas, nga mikabat sa 36 ka mga ahensya ug pribadong bahan ang mipadayag sa ilang mga kasibut nga moduyog sa Outreach Mission sa Kapitolyo.

Gitanyag isip kabahin sa tinuig nga dalit pagpangandam alang sa kapistahan sa lungsod, ang duha ka kalihukan gitumong aron abagan ang katawhan sa paggahum kanila nga makalahutay sa pagbangon bisan sa kawad-on.

Gawas sa libreng serbisyo, ang pagbukas sa Agro-Industrial Fair sa lunsgod magtabang usab sa mga ag-uuma sa pagpadangat sa ilang produkto ug abut sa uma ngadto sa lungsod og sa mga mamalitay.

Pagsumpay sa kasagaran nga bugto nga koneksyon sa mga mag-uuma sa Clarin ngadto na sa mga mamalitay sa kamerkadohan ang nag-unang mga negosyante nga nanginahanglan sa mga raw materials alang sa ilang mga produksyon ug manufacturing, matud ni Municipal Agriculturist Donatela Cardino.

Mga produktong saging, cacao, mga lagutmon, utanon ug duma ang mga kuha sa dagat ang anaa sa matag kubo sa barangay nga misalmot sa Agro Industrial Fair nga gibuksan usab dungan sa pagbukas sa Outreach Mission.

Ang Clarin duna nay sobra nga produksyon sa humay, may 30 na ka ektarya nga cacawan ug laing 20 ka ektarya nga sagingan, nga maoy napakita sa agri fair. (rahc/PIA-7/Bohol)

Mi-okupar sa sentro sa entablado sa Clarin ang mga bunga ug abut sa uma samtang nabuksan ang usa ka adlaw nga agro-Industrial Fair dungan sa gihimo usab nga Outreach Mission sa Kapitolyo September 25. Didto si Isabelito Tongco alang ni Gob Edgar Chatto, Mayor Allen Ray Piezas sa Clarin, ug mga kagawad sa lungsod. (rahc/PIA-7/Bohol)