Isumbong ang pagpa-ila'ng

NPA, awhag ni Gob Chatto

TAGBILARAN CITY, November 16, 2017 (PIA)--Kon may magpa-ila nga sakop sa New People's Army (NPA), itaho gilayon. 

Kini maoy hangyo ni Gob Edgar Chatto ngadto sa mga Bol-anon nga hangtud karon, nagpabiling gihulga sa pagbalik sa mga rebelde nga napahawa na sa Bohol sukad pa niadtong 2010. 

Gibutyag usab ni 3rd infantry Division sa Philippine Army nga si Major John Ayeng, nga mas grabe ang pagpaningkamot sa mga rebelde nga mahibalik sa Bohol karon.

Si Aying mitambong sa joint meetings sa Provincial Peace and Order Council ug sa Provincial Anti Drug Abuse Council didto sa Governor's Mansion Nobyembre 16 sa palis. 

Duha ka fronts ang giingong atake sa mga rebeldeng komunista aron lamang makabalik sa Bohol, matud pa sa opisyal sa 3ID. 

Una, pinaagi sa mga legal fronts nga mangaghat og katawhan nga magpundok, manghaylo sa mga proyekto nga pundohan aron may kalangoyan ang mga sakop nga mobalik, apan kini dili molahutay, ug ang pagpanghadlok, matud ni Maj Aying. 

Lakip na niini ang giingon nga mga tawo nga magsuroysuroy nga mangayog kwarta o libre nga serbisyo human manghadlok nga sakop sa mga NPA. 

Gipahinumdom ni 47IB Commanding Officer LtCol. Eufracio Malig nga ang mga NPAs mga kontra sa balaod ug ang pag-angkon nga NPA isipon na sila nga armado. 

"Ning sitwasyona, ayaw pagpa-ila nga nahadlok ka, gani, pangitag paagi nga ikasumbong kini sa mga tinugyanan sa balaod," dugang hangyo ni Col Malig. 

Dugang ni Gen Arnulfo Matanguihan, 302nd Brigade Commander nga ang tinuod nga NPA, dili dali nga moangkon. 

Subay niini, aghat ni Gob Edgar Chatto, "Kon may mopaila nga NPA, itaho dayon sa mga otoridad." 

"Kinahanglan nga dili nato ipa-ubos ang atong pagmabinantayon," mandu ni Chatto, kay "kadtong magpaila nga sakop sa NPA, kinahanglang imbitahan aron imbestigaron kay ang mga NPAs mga outlaws."

Daghan na usab nga kaso sa Bohol nga may mga negosyante nga nakahatag gayud og kwarta ngadto sa mga tawo nga mipaila nga rebelde ug nangulekta'g rebolusyonaryong buhis. 

Segun pa sa mga tinubdan, kadtong mga tawo nga mohatag og tabang alang sa mga rebelde, mahimong kasohan dayon og rebelyon og pag-abag sa kalihukang kriminal. (rahc/PIA-7/Bohol)