Philpost mitubag sa hagit

Sa email batok sa koryo

TAGBILARAN CITY, November 14 (PIA)—Nagsagubang sa labing dako nilang hagit, padayon ang Philippine Postal Corporation (PhilPost) sa pagpamaayo sa serbisyo sa koryo subay sa panginahanglan sa panahon. 

Kini maoy gibutyag ni PhilPOst Tagbilaran Postmaster Maria Nena Tubaon, didto sa Kapihan sa PIA. 

Sa radio forum nga naghandum sa buwan sa Nobyembre isip buwan sa Postal consciousness, gisaysay ni postmaster Tubaon nga sa pagkamatuod, nagkadyutay na ang migamit sa koryo tungod sa electronic mail. 

Apan bisan pa niini, ang PhilPost mi kita sa kinatibuk-ang 60 ngadto sa 70 % sa pagpadala og mag suwat sa mga katawhan ngadto sa usa’g usa ug sa mga suwat nga ipadala sa pagpadagan sa kagamhanan. 

Ug aron sa pagkampanya, gipasalig sa Philpost nga wala nay mail nga mawala nga dili mahibaw-an kon diing dapita nawala, samtang gisagop na usab sa kagamhanan ang sistema sa pagtrack sa mails. 

Hinay man kon itandi sa ilang kinakusgang kaatbang nga electronic mail (email), ang paggamit sa koryo usa pa gihapon sa gisaligang paagi sa pagpadala sa komunikasyon, sagbat ni Tubaon atul sa kapihan. 

Sa email, lisud nga igkita ang personalidad sa nagpadala sahi sa personal nga koryo nga gisuwat sa kinamot, gihagu-an og usahay gipasulod pa gani sa gipahumotan nga sobre ang humot nga dahon sa mga suwat, dugang ni Tubaon. 

Gawas pa, opisyal nga may sistema sa tracking sa registered ug sa expressmail nga maoy dawaton sa mga korte sa pagmatuod nga tinuod gyud ang komunikasyon, dugang niya.

Dili ang email, kon dili ang suwat sa koryo nga gipadala sa Post Office pa gihapon ang opisyal nga gidawat sa mga korte, palubad ni Tubaon.

Alang niini, isip korporasyon nga iya sa kagamhanan, padayon pa gihapon ang PhilPOst sa pagkampanya nga ikabalik ang pauso nga pagsinuwatay isip pagpatuman sa disiplina, tukmang pagbalaybalay, tukmang pagtagik sa mga pulong ug teknikal nga kahibaw sa pagpadala nga walay risgo nga ma return to sender. 

Giaghat usab sa Philpost ang mga katawhan sa pagsuportag balik sa pagsinuwatay ug pada-anay sa mga mensahe, samtang ilang gipasalig nga madawat ang suwat sulod sa 24 oras. 

Kini daku nag kalainan sa pamaagi kaniadto nga modangat pag dugay ayha pa mabasa ang mensahe gikan sa mahal sa kinabuhi. (rahc/PIA-7/Bohol)