Pang-10 sa 14 ka BFAR 

CFLC gibuksan sa Loon 

LOON, Bohol, November 14 (PIA)—Gipangunahan sa mga kadagku-an sa Bureau of Fisheries and Aquatic Resources (BFAR) ang pagsubo sa ika napulo nga Community Fish Landing Center (CFLC) sa Loon, nga nahimutang sa Mercado de Loon, Cogon Norte, Nobyembre 14. 

Gipangunayan ni BFAR 7 Regional Director Allan Poquita ug Bohol Fishery Officer Leo Bongalos ang pagsaksi sa opisyal nga pagbukas sa pasilidad nga hagbonganan sa mga isda nga kuha sa mga mangingisda sa lungsod.

Ang CFLC usa sa mga interbensyon sa Department of Agriculture ilawom sa programang Targeted Action to Reduce Poverty and Generate Economic Transformation (TARGET), saysay ni program emcee, Jannes Cantones. 

Kahinumduman nga ang mga CFLC gipundohan sa nasudnong kagamhanan pinaagi sa BFAR sa sistema nga abagay sa mga kalungsuran nga may maayong accomplishment sa mga programa nga gipatuman sa BFAR.

Matud ni BFAR Bongalos, ang CFLC sa Loon, maoy ika napulo sa 14 ka CFLC nga nahatag sa nasudnong kagamhanan sa mga kalungsuran sa Bohol sa milabay nga duha ka tuig. 

Walo ka CFLC ang nakuha sa Bohol niadtong 2016 sa bili nga tag P2 milyones samtang laing unom ka CFLC usab ang napundohan sa 2017.

Gibutyag ni Loon Mayor Elvi Peter Relampagos nga ang Loon lakip sa unang 100 ka Local Government Units nga malampusong nakahuman sa Fish’r survey nga gipahigayun sa BFAR, ug maoy usa sa mga rason nga natanyagan sa CFLC. 

“Ang CFLC mipakita sa way puas nga suporta sa nasudnong kagamhanan nga makahatag og mga pasilidad nga nagsuporta sa pangisda nga magserbisyo aron makaabag sa produksyon alang sa seguridad sa pagkaon.

Kini aron usab aron makahatag sa self-sufficiency, nga makapauswag sa kahimtang sa kinabuhi sa mga katawhan ug sa pagpataas sa global competitiveness, saysay sa marker sa CFLC nga gibuksan alang sa publiko. 

Ang marker gilagdaan nila ni Presidente Rodrigo Duterte, Kalihim sa Agrikultura Emmanuel Pinol ug BFAR Director Eduardo Gungona.

Didto uban sa mga taga BFAR sila Gobernador Edgar Chatto, Kongresista Rene Relampagos, Board Member Ricky Masamayor, Loon Mayor Elvi Peter Relampagos, mga konsehal sa lungsod og mga kapitanes, LGU Chiefs ug mga empleyado.

Gipangunahan usad ni Fr. Ruel Tumangday ang pagpabalaan sa pasilidad nga gitukod sa luyo sa bag-ong Mercado de Loon, sa Cogon Norte. 

Ang Loon may 32 ka coastal barangays nga makagamit sa bag-ong pasilidad, matud pa ni Mayor Elvi Relampagos.

Ang CFLC sa Loon usa sa tulo ka mga pasilidad nga pipundohan sa kagamhanan nga gibuksan karong tuiga, aron makatabang sa atong mga mangingisda nga naglisud sa kinabuhi. (rahc/PIA-7/Bohol)