Labing unang tigum sa Konseho 

sa Wahig INREMP, sa Enero 23

TAGBILARAN CITY, January 22, (PIA)--Magtigum ang Bohol Provincial Wahig-Inabanga Watershed Management Council (PW IWMC ) sa Enero 23, 2018 alang sa labing unang council meeting sa 2018 aron hisgutan ang mga kalambuan sa Integrated Natural Resources and Environmental Management Project (INREMP). 

Gipasabut ni Provincial Environment and Natural Resources Officer (PENRO) Eusalem Quiwag nga ang INREMP pito ka tuig nga programa nga gipatuman sa Department of Environment and Natural Resources (DENR) Bohol sa Wahig-Inabanga River Basin sugod pa niadtong 2013 ug molungtad pa hangtud sa 2020. 

Hisgutan sa tigum ang mga kalambu-an samtang maghimog pagbalik tan-aw sa mga nakab-ot na nga kalampusan dungan usab sa pagsagubang sa mga suliran nga gikabagat sa pagpatuman sa programa subay sa katuyuan niini. 

Tumong sa INREMP ang pagduso sa kaugmaran ug pagpataas sa kahimtang sa mga kalikopan ug molupyo sa Wahig-Inabanga Upper River Basin, dugang ni PENRO Quiwag. 

Kini pinaagi sa pagpatuman sa mga programa'ng pangkaugmaran ug kalihukan sama sa reforestation ug pagpatuman sa mga imprastraktura sa pag-abag sa kahugpungan sa mga molupyo didto. 

Gilauman mgha pangunahan ni Gobernador Edgar M. Chatto ang tigum sa iyang kapasidad isip chairman ug nagpanday sa Executive Order No. 10, Series of 2015 subay niini agi og tigdumala ug policy governing body sa Wahig-Pamacsalan Inabanga Watershed.

Ang Wahig-Inabanga, maoy giisip nga labing mahinongdanong suba-saluran sa mga pilot saites sa INREMP sa rehiyon tungod sa dako niining potensya sa tinubdan sa tubig alang sa umahan, kabalayan, commercial ug industriyal nga gamit. 

Gawas pa, ang Wahig Pamacsalan adunay daghang produktibong kapatagan ug kabasakan, mga dagkong kalasangan ng gipuy-an sa mga gipanalipdang mga mananap ug hayup. 

Wahig-Inabanga River Basin nagalangkob sa 17 ka kalungsuran sa Inabanga, Buenavista, Getafe, Talibon, Trinidad, San Miguel, Alicia, Pilar, Duero, Jagna, Sierra Bullones, Carmen, Dagohoy, Danao, Sagbayan, Ubay ug Garcia Hernandez.

Ang pagpatuman sa INREMP gipahiluna usab aron mahiusa sa provincial watershed management council aron dili na magkabangga ang mga kalihukan ug programang pangkaugmaran sa duha ka pundok ug mahasibo na sa mga tagsatagsa ka laraw usab nga gidibuho sa municipal management planners.

Subay sa paghatag og gahum sa lokal nga kagamhanan, ang INREM nakig-alayon sa mga local government units sa pagpanalipud ug pagpatunhay sa mga tubig-saluran niini isip tinubdan sa maayong kalidad sa tubig nga maopalutaw sa kaugmaran. 

Gawas sa Wahig-Pamacsalan, ang ubang INREMP project sites naa sa Chico River Basin sa Cordillera Administrative Region (CAR), Bukidnon River Basin sa Northern Mindanao ug sa Lake Lanao Basin sa ARMM. (rahc/PIA-7/Bohol/DENR)

Lakip ang mga kabataan, gikampanya sa INREMP ang pagpanalipod sa kalikopan ug katubigan sa Wahig-Pamacsalan isip mga mahinungdanong tinubdan sa kahinguhaan nga kasaligan sa mga komunidad sa ilang paglutaw nagdto na sa laugmaran. (rahc/PIA-7/Bohol/filephoto)