Deployment sa mga OFW sa 

Kuwait, gi-suspenso na sa DOLE

MANILA, Enero 22 (PIA)--Gisuspenso na sa Department of Labor and Employment (DOLE) ang pagpadala og mga Overseas Filipino Workers (OFWs) paingon sa Kuwait.

‘Effective immediately’ ang kamanduan ni Department of Labor and Employment (DOLE) Kalihim Silvestre Bello III ngadto sa Philippine Overseas Employment Administration (POEA).

Gimanduan ni Bello ang POEA nga ihunong na ang pag-proseso sa overseas employment certificates (OEC) sa mga OFW nga paingon sa Kuwait.

Apan gitataw usab ni Bello nga kadtong mga wala pa nakakuha og OEC ang nalakip niining deployment ban samtang kadtong OFWs nga may OEC na, makapadayon pa sa paglarga sa Kuwait. 

Una nang miingon si Presidente Rodrigo Duterte nga gusto niyang magpatuman og total ban sa pagpadala og OFWs sa Kuwait tungod sa mga kaso sa pagmaltrato ug sexual abuses nga nahiagoman ilabi na sa mga kababayen-an.

Sa kasamtangang pagpahunong sa deployment og mga trabahanteng Pinoy sa Kuwait, mas matun-an og maayo ug mahisgotan sa gobyerno sa Pilipinas ug Kuwait kun unsa ang mga gikinahanglang himuong lakang aron malikayan ang mga pag-abuso sa mga OFWs didto. (ecb/PIA7-Bohol)

==============

OFWs, PWDs, senior citizens, pwede na 

nga dili mopila sa pagkuha og passport

MANILA, Enero 22 (PIA)--Gitin-aw sa Department of Foreign Affairs (DFA) nga dili na kinahanglang mag-set pa og appointment ang mga overseas Filipino workers, person with disability ug senior citizen aron lamang maka-apply sa ilang mga pasaporte.

"Ang mga OFW walang kailangang appointment," kini ang gi-klaro ni DFA Assistant Secretary Frank Cimafranca sa Office of Consular Affairs sa usa ka radio interview ning bag-o lang.

Matud pa ni Cimafranca, basta dalhon lang sa aplikante ang tanang gikinahanglang dokumento sa pagkuha og pasaporte, mahimo na kining mo-apply isip walk-in sa priority lane sa buhatan sa DFA Aseana o sa mga regional consular satellite offices niini.

Mahimong makapahimos sa priority lane ang mga senior citizens nga adunay dalang senior citizen ID, persons with disability nga may dalang PWD ID o visible disability, solo parent nga may dalang valid solo parent ID, babayeng buntis nga may dalang medical certificate ug mga minor de edad nga 7 anyos paubos.

Kining mga pahinumdom makita usab dayon sa ilang website nga www.dfa.gov.ph, pagbutyag pa ni Cimafranca.

Samtang giseguro usab niini nga gihimuan na nila og paagi aron mas mahimong dali alang sa mga nangita og trahabo sa abroad nga makakuha og pasaporte. (ecb/PIA7-Bohol)

=================

Kulturang Panglaoanon, 5th place 

sa Sinulog based street dancing

TAGBILARAN CITY, Enero 22 (PIA)--Nasakmit ang ikalimang puwesto sa Kulturang Panglaoanon sa munisipalidad sa Panglao ang kategoryang Sinulog based sa gipahigayong Sinulog Grand Parade 2018 kagahapon didto sa syudad sa Sugbo.

Gawas niini, nakuha usab sa grupo ang ika-upat nga dapit sa kategoryang Best in Musicality.

Gilangkoban sa 380 ka sumasalmot ang Kulturang Panglaoanon diin 80 niini ang performers ug 300 ang prop handlers ug lead dancers.

Ang lungsod sa Panglao ang usa sa lima ka out-of-town contingents nga nisalmot sa maong tinuig nga kasaulogan.

Ang maong grupo nakadawat og ganting salapi nga P200,000 isip 5th place sa kategoryang Sinulog based ug P20,000 isip 4th place Best in Musicality.

Ang syudad sa Carcar ang daghang nadaugan ning tuig nga Sinulog Grand Parade human nila nasakmit ang tulo ka dagkong awards -- Sinulog-Based champion, Best in Costume, ug Best in Musicality. (ecb/PIA7-Bohol)

 Ang Kulturang Panglaoanon sa munisipalidad sa Panglao nga nakasakmit sa 5th place sa kategoryang Sinulog based ug 4th place Best in Musicality sa gipahigayong Sinulog Grand Parade 2018 niadtong Domingo didto sa syudad sa Sugbo. (hulagway ni Deo Guden)