Mga pamaagi pagsalmot sa 

Alicia trail run, gipagawas 

TAGBILARAN CITY, February 1 (PIA)--Dili mahimong modagan ang usa ka runner nga walay race bib ug bisan ang pacer nga wala ma rehistro; kon makalusot og masakpan nga naa sa ruta, papahawaon ug ang dili na ikauli ang iyang rehistro. 

Kini ug pipila ka tamdanan alang sa mga misalmot sa The Alicia Panoramic Park (TAPP) Trail Run 2018 karong Sabado, nga magsugod sa The Farm, Cambaol, Alicia, Bohol. 

Ipatuman usab sa 171 ka trail runners alang sa 5 kilometers ug 193 ka runners nga rehistrado sa 21 kilometros nga lumba tadlas sa mga kabungturan sa Alicia ang estriktong assembly ug check in time sa alas 4:00 sa kaadlawon sa Sabado sa dili pa ang gunstart sa alas 5:30 alang sa 21 K runners ug alas 5:00 sa buntag sa dili pa ang 6:30 nga lumba alang sa 5 K runners. 

Ang modagan sa 21 K kinahanglang motapus sa ruta sa 7 ka oras, matud ni race Director Richard Anania.

Kinahanglan usab dalhon sa matag runner ang mandatory gears sa iyang pagclaim sa race kits.

Ang mandatory gears sa 21K runners mao ang hydration bag o water bottle nga may labing menos usa ka litro nga tubig, cellphone nga punos sa baterya ug igo nga load para ikatawag sa race director kon may emergency, pito (whistle) ug dyutay nga pagkaon samtang nagtadlas sa trail. 

Bisan usab tunga sa litro nga tubig ang bitbit sa 5 K runner, cellphone nga may load ug puno sa baterya aron ikapanawag sa assistance kon may kabilinggan samtang nag-apil sa lumba.

May tulo ka Aid Stations subay sa ruta nga mahimong kuhaan sa mga runners sa pagkaon sama sa lugaw, saging, watermelon, softdrinks ug tubig apil ang light snacks sama sa biscuits, kini usab mahimong opisyal nga exit points alang sa mga runners nga dili mopadayon sa lumba. 

Ang mandatory gear, kinahanglang ikapakita usab sa runner sa matag checkpoint subay sa ruta, aron dili siya ma disqualify. 

Gawas sa mandatory gears, gisugyot usab ang gloves, trekking poles, kalo, sunblock o sunscreen, arm sleeves, leggings o tights ug first aid kits, segun sa organizers. 

Sa mga ruta, may mga timailhanan sa agi-an sa lumba apan ilang gisaligan ang runner nga magbantay sa mga tuimailhan kanunay ug gidason nga ilegal ang pagbalhin ug pagtandog sa mga timailhanan aron pagsaag sa mga magsunod nga runners, matud ni Anania. 

Ug tungod kay buot sa mga organizers nga walay mahibiling basura sa agi-an sa lumba, ang masakpan nga maglabay og basura i-disqualify samtang tubig lamang ug walay mga plastic nga baso ang ipanghatag sa Aid Stations. 

Responsibilidad usab sa runners and pagseguro nga nakalista ang iyang race number sa matag checkpoint, tungod kay mahimong ma diqualify kon wala malista sa checkpont. 

Sa katapusan, giawhag sa mga organizers nga mas maayo nga makaapil na sa race kits distribution orientation ug sa Biyernes, alas 10:00 ngadto sa alas 5:00, adto sa Municipal Hall grounds sa Alicia. 

Subay niini, milaum ang Alicia, pinangulohan ni Mayor Marnilou Ayuban nga mahimong malampuson ang ilang labing unang Trail Run samtang ilang gibuksan ang The Alicia Panoramic Park (TAPP) alang sa sports tourism. 

Milaum usab si Tourism Officer Godelia Lumugdang nga himoon sa mga taga Alicia ang kalihukan nga lunsaran sa mga ginagmay nga negosyo agi og pagshowcase sa kamaayong tawo sa mga taga Alicia. (rahc/PIA-7/Bohol)

Walay magbilin og maglabay og basura o matangtang sa lumba, kini maoy pahimangno sa race organizers sa TAPP Trail Run 2018 sa Alicia Bohol karong Sabado sa kaadlawon. Kapin sa 300 ka runners ang narehistro nga mosalmot sa 5K ug sa 21 K nga lumba. (PIA-7/Bohol/Alicia)