Asenso Negosyo Caravan 

sa BIPC ipadayon sa '18

TAGBILARAN CITY, February 6 (PIA)--Nagkadaghan na ang mga kalungsuran sa Bohol nga nakakita sa kamaayo sa pagpahigayon sa Asenso Negosyo Caravans dungan sa ilang mga kasaulugan, kini samtang may nakalinya na usab nga caravans alang sa 2018. 

Matud pa sa hepe sa Bohol Investment Promotion Center (BIPC) nga si Maria Fe Dominese ang epektibo ang ilang gipanghanyag nga Business one Stop Shop (BOSS) Asenso Negosyo Caravans sa lima ka kalungsuran niadtong 2017, segun sa 1,266 na ka tawo nga ilang natabangan nga makapundar og bag-ong negosyo. 

Sa Caravan, gipasabut sa BOSS coordinator nga si Ligaya Castillo nga iakuban sa BOSS ang mga ahensya nga ilang katambayayong: ang Department of Trade and Industry (DTI), Pag-IBIG, PhilHEALTH, Social Security Systems, and Bureau of Internal revenue ug ang Securities and Exchange Commission (SEC). 

Sa caravan, mahimong iproseso ug makuha ang business name ug registration pinaagi sa DTI, dungan na usab sa serbisyo sa PAG-IBIG alang sa mamumuhunan ug trabahante sa negosyo nga sugdan, pagpasulod sa PhilHealth nga karon pugos na sa balaod, pagpailawom sa SSS, pagkuhag registration sa BIR aron makakuhag resibo ug ang pagparehistro sa SEC alang sa mga korporasyon ug sa mga kapunungan nga magnegosyo. 

Gawas niana, may mga business counsellors usab nga pataban sa Caravan nga makahatag sa dugang tambag sa mga mamumuhunan kon unsay maayo alang sa ilang mga negosyo. 

Ang BOSS Asenso Negosyo Caravan, gidala sa Kagamhanang Probinsyal ngadto sa kalungsuran agi og gesture sa goberno nga miduol na sa katawhan. 

Kini usab, matud pa ni Dominese, usa ka pamaagi nga ang mga negosyante magiyahan sa mga angayan nga buhaton aron malambo ang ilang pamuhunan ug masukip na sila sa mga listahan sa angayan nga hatagan sa dugang pang mga serbisyo ug bansay aron mahimong mas makalahutay. 

Natanyag na sa BIPC uban usab sa aghat sa Inabanga, Dimiao, Sevilla, Baclayon ug Candijay ang BOss Asenso Negosyo Caravan samtang nakapila na ang tulo ka lungsod alang sa unang upat ka buwan sa 2018. 

Lain nga napulo ka lungsod ang nasuroy og nahatagan sa Asenso Negosyo Caravan sa 2016, segun pa sa BIPC. 

Ang BOSS Asenso Negosyo Caravan dako usab og gikatabang nga nakab-ot na sa Bohol ang 5,372 ka mga bag-ong negosyo sa 2017, nga nakapasugod sa pagpanarbaho sa 11,962 ka mga bag-ong trabahante, segun sa BIPC, atul sa Kapihan sa PIA niadtong Huwebes.

Kini nga lakang usab may dako nga gikatampo sa serbisyo sa kagamhanan ilabi na niadtong mga kalungsuran nga wala pa katukori sa ilang mga Negosyo Centers. (rahc/PIA-7/Bohol)

Mas dan-ag nga kaugmaon alang sa mga mamumuhunan human himoa ang regular nga outreach program sa BIPC ang BOSS Asenso Negosyo Caravan ngadto sa kalungsuran sa Bohol. Gipasabut usab sa BIPC nga malaumon sila sa 2018 nga mas modaghan pa ang pamuhunan. (rahc/PIA-7/Bohol)