Ikaduhang Martes sa Pebrero matag tuig, 

gideklarang ‘Safer Internet Day for Children’

TAGBILARAN CITY, Pebrero 07 (PIA)--Gilagdaan ni Presidente Rodrigo Duterte ang Proclamation No. 417 nga nagdeklarar sa ikaduhang Martes sa Pebrero matag tuig isip ‘Safer Internet Day for Children Philippines.’

Ang pag-aprubar sa maong proklamasyon agi og pagsunod sa gobyerno sa nakalatid sa 1987 Constitution nga ma-establisar ug mapanalipdan ang kaayohang pisikal, moral, espiritwal, intelektwal ug sosyal sa mga kabataan tungod kay mahinungdanon ang papel niini sa paglambo sa nasod.

Ubos sa Republic Act No. 9775 o ang ‘Anti-Child Pornography Act of 2009’, gitahasan ang gobyerno nga masiguro ang kahilwasan sa matag kabataan batok sa bisan unsang matang sa pang-abuso, pagpasagad ug uban pang kondisyon nga mahimong maka-apekto sa pagtubo sa bata isip tawo.

Tungod niini, malipayong gi-endorso sa Inter-Agency Council Against Child Pornography (IACACP) ang pag-aprubar sa maong proklamasyon.

Nakalatid sa Proclamation 417 nga ang tanang ahensiya sa gobyerno ug bisan ang pribadong sektor, gi-awhag nga makighiusa sa IACACP sa mga adbokasiya niini ug sa implementasyon sa mga programa ug aktibidad nga himuon isip pagtamod sa proklamasyon.

Ang ‘Safer Internet Day’ una nang gilusad sa pipila ka mga nasod sa Europa niadtong tuig 2004.

Karon, nalakip na ang Pilipinas sa halos 100 ka nasod sa tibuok kalibotan nga mag-obserbar sa maong adlaw aron mapalapdan pa ang kaamgohan sa publiko sa mga online issues nga gi-atubang sa mga kabataan. (ecb/PIA7-Bohol)

===============

Barangay, SK election

mahinayon karong Mayo 

TAGBILARAN CITY, Pebrero 07 (PIA)--Mahinayon gayud sa Mayo ang piniliay alang sa mga posisyong pang-Barangay ug Sangguniang Kabataan (SK).

Sa gipahigayong joint press conference kagahapon, Pebreo 6, sa Commission on Elections (COMELEC) ug Department of the Interior and Local Government (DILG), gikumpirmar ni DILG Undersecretary Martin Diño nga mahinayon ang piniliay nga gitakda sa Mayo 14 ning tuig.

Matud pa ni Diño, gitakda ang pagduso sa Certificate of Candidacy (COC) gikan Abril 14 hangtod sa Abril 20 samtang ang campaign period magsugod sa Mayo 4 hangtod Mayo 12.

Dungan niini, gilusad usab kagahapon sa DILG ang ‘Matino, Mahusay, at Maasahan’ information drive nga nag-awhag sa mga botante nga dili ibotar ang mga opisyal nga nalambigit sa operasyon sa ilegal nga droga.

Kahinumdoman nga gi-suspenso sa COMELEC ang pagpahigayon sa Barangay ug SK elections sa syudad sa Marawi.

Kini matud pa ni COMELEC Spokesman James Jimenez tungod sa kondisyon sa maong lungsod.

Gipasabot ni Jimenez nga magpahigayon pa sila og re-assessment human ang tulo (3) ka buwan ug kun mapamatud-ang mahimo na, ipadayon pa gihapon ang piniliay sa Barangay ug SK didto nga gitakda karong Mayo 14. (ecb/PIA7-Bohol)

================

Preparasyon sa seguridad sa CVIRAA 

meet dinhi sa Bohol, gisugdan na sa PNP

TAGBILARAN CITY, Pebrero 07 (PIA)--Ang kapolisan sa tibuok lalawigan sa Bohol nagsugod na sa ilang preparasyon alang sa seguridad sa Central Visayas Regional Athletic Association (CVIRAA) meet dinhi sa syudad sa Tagbilaran karong buwan.

Gibanabanang 6,000 ngadto sa 7,000 ka estudyanteng atleta ang mosalmot niining rehiyonal nga paugnat sa kusog nga gitakdang ipahigayon karong Pebrero 24-28 dinhi sa syudad sa Tagbilaran ug sa ubang lungsod ning lalawigan.

Ang CVIRAA ning tuig mobalik sa 19 ka dibisyon gikan 13 sa niaging tuig human gibungkag ang Negros Island Region (NIR).

Si Tagbilaran police chief Superintendent Patricio Degay nagkanayon nga mga 500 ka police officers ang e-deploy sa mga key areas lakip na sa mga lugar diin ipahigayon ang mga duwa sa CVIRAA.

Matud pa ni Degay nga dugang kapolisan usab gikan sa nagkalain-laing lungsod sa Bohol ang gitakdang ipadala aron motabang sa mga kapolisan ning syudad alang seguridad sa mga atleta.

Samtang sa iyang bahin, si Bohol Provincial Police Office (BPPO) Director Sr. Superintendent Angeles Geñorga nimando na sa nagkalain-laing estasyon sa kapolisan sa kalungsoran diin ipahigayon ang mga duwa sa CVRAA sa pagsugod na sa ilang preparasyon alang sa seguridad sa mga atleta.

Gidugang usab ni Degay nga gimanduan na usab ni Geñorga ang mga municipal police chiefs sa pagpadala og dugang kapolisan sa mga tourist spots nga gipaabot nga bisitahon sa mga atleta.

Gusto sa BPPO chief nga susamang hugot nga seguridad ang ipatuman sa CVIRAA sama sa gi-implementar sa niaging tuig atol sa Association of Southeast Asian Nations (ASEAN) meetings sa Bohol, matud pa ni Degay. 

Ang CVIRAA ginapahigayon isip kulminasyon sa Physical Education program sa mga tunghaan ug selection process usab alang sa Palarong Pambansa. (ecb/PIA7-Bohol)