Agaton, Basyang mi-daut sa

P72 milyones nga panguma

TAGBILARAN CITY, March 9 (PIA)--Dul-an sa 72 milyones ka pesos ang kadaut nga gibilin sa duha ka labing bag-ong bagyong mikusokuso sa pipila ka dapit sa Bohol.

Kini maoy taho nga gipaambit sa Office of the Provincial Agriculture (OPA) nga gipangulohan ni Larry pamugas apan gipadayag ni Rowena Dante kinsa mibarug didto sa labing bag-ong Provincial Disaster and Risk Reduction Management Council (PDRRMC) sa Full council meeting niini Marso 7 didto sa Mansion.

Ang dul-an sa 72 milyones nga gikataho, mao ang kinatibuk-ang kadaut sa agrikultura ug pangisdaan nga nasayang tungod sa bagyong Agaton niadtong Enero ug Basyang niadtong Pebrero, segun pa sa mga tinugyanan sa OPA.

Hinuon, ang nataho mao ang mga gipasa nga taho sa kadaut nga gipasa sa 10 lamang ka lungsod nga apektado sa Agaton ug 11 ka kalungsuran nga apektado sa Basyang.

Segun sa taho nga gipaambit sa PDRRMC nga nagtigum sa pagtawag ni Gob Edgar Chatto, mikabat sa P69, 139, 242.00 ang kadaut sa agrikultura ang gibilin sa duha ka bagyong milabay samtang kinatibuk-ang P2, 854, 105 usab ang kadaut sa pangisdaan.

Ang mga kadaut naglangkob sa mga ming-apaw nga basakan nga duol na unta sa pagka anihon, mga gipanglunopan nga mga umahan, mga kalubihan nga nangadaut ug mga punong nga ming-apaw ug ang mga isda nakaipsot kuyog sa baha.

Sa humay lamang gani, sa duha ka nagsunod nga bagyo, miabut sa 68, 796, 453. 21 ang kinatibuk-ang nadaut gikan sa mga kalungsuran sa Alicia, Sierra Bullones, Bilar, Candijay, Valencia, Danao, Batuan, Garcia Hernandez, Carmen, Jagna, Catigbian, Sevilla, Sagbayan, Duero, Calape ug Inabanga.

Labing dako ang kadaut nga nadala sa duha ka bagyo alang sa mga kahumayan sa Bohol.

Sa taho ni Dante, napagawas nga sa humay lamang ug wala pay labut ang ubang mga lagutmon ug mga pananum, mikabat na sa P68, 796, 453.21 ang kinatibuk-ang kadaut.

Sa Pangisdaan usab, P2, 854, 105 ang kadaut nga nasinati, segun sa OPA.

Wala hinuon maapil sa taho kon ang mga kadaut sa panguma, napailawom ba sa crop insurance, aron may dyutay nga kasegurohan ang mga mag-uuma kansang mga puhunan gibanlas lamang sa uwan nga dala sa bagyo. 

Niini usab, giawhan sa mga sakop sa PDRRMC ngadto sa mga Municipal Agricultural Officers nga itaho dayon ang mga nakita nga kadaut sa agrikultural ilabi na sa mga bagyo ug katalagman aron makapangandam ang lalawigan sa unsa man ugaling ang gikinahanglan aron kahulipan ang pagkuwang unya sa supply.

Sa 47 ka lungsod ug usa ka syudad sa Bohol, 16 lamang ka kalungsuran ang miduso sa ilang mga typhoon damages to agriculture, base sa taho usab sa OPA ngadto sa PDRRMC. (rahc/PIA-7/Bohol)

Pipila lamang ka lungsod sa Bohol and miduso sa taho nagdto sa PDRRMC sa kadaut nga nasinati sa panguma sa mga milabay nga mga bagyo, butang nga nagpalutaw sa punto mahimong magkalisud ang Bohol sa pag-supply sa pagkaon kay pagdahum nga aduna pay ma-ani apan nadaut na diay sa katalagaman. (rahc/PIA-7/Bohol)