Coast Guard sub-stations 

sa Loay Getafe gipabarug

TAGBILARAN CITY, March 8 (PIA)--Mas matutokan na ang seguridad ug kaluwasan sa mga turista og pasahero nga manakayay sa depasahero-an nga bangka sa Loay ug Getafe. 

Kini human opisyal nga gipabarug sa Philippine Coast Guard (PCG) ang sub-stations niini alang sa River Cruises sa Loay ug sa mga byahe nga padung sa mga isla ug paingon sa Sugbo gikan sa pantalan sa Getafe. 

Mismo si Philippine Coast Guard (PCG) Region 7 District Commander Lyndon Latorre ang mitunol sa mission orders didto sa pormal nga pagtugyan sa Jjs Seafoods Village alang sa duha ka opisyal sa PCG nga mao nay mangulo sa duha ka substation nga gipabarug Marso 7. 

Gisangonan si hepe sa substation sa Panglao nga si PO1 Lito Pascua nga maggunit na usab sa pwesto isip hepe sa bag-ong gipabarug nga Loay substation. 

Ang PCG sa Loay Substation maoy magseguro nga ang mga bangka nga mobyahe paingon sa river cruises may tukmang kargada nga pasahero, ang bangka nga gigamit, sea worthy ug ang mga kapitan ug tripolante rehistrado, alang sa kasegurohan sa pasahero. 

Sa laing bahin, gisangonan usab sa responsibilidad sa pagdumala sa kaluwasan sa kadagatan si CPO NIcolas Jaluag isip substation Commander sa Getafe Police Station. 

Ang Getafe maoy labing duol nga bahin sa Bohol ngadto sa Sugbo ug gikan sa lungsod, may regular nga byahe sa bangka paingons a Sugbo ug modunggo didto sa Pasil o sa Pier 3. 

Ang pagpabarug sa duha ka Substations sa PCG nagpadaghan sa mga base sa mga mga tinugyanan sa kagamhanan nga nasangonan sa pagpatuman sa mga balaod sa dagat o maritime laws, maritime search and rescue, maritime environment protection ug maritime security. 

Nagpadayun nga nagbarug karon sa Bohol ang Tagbilaran, Tubigon, Talibon, Ubay, Pitogo, Panglao ug Jagna stations samtang naa na usab ang substations sa Loboc, nga sakop sa Tagbilaran, Clarin nga sakop sa Tubigon.

Sa laing bahin pa gihapon, gitapos ni Capt Edgar Boado ang iyang hamubo nga tour of duty isip Bohol Coast Guard Commander human sa tulo ka buwan kapin nga serbisyo sa mga Bol-anon. 

Usa ka medla of Merit ang gidawat ni Capt Boado gikan kang Commodore Latorre human usab itunol ni Capt Boado ang bandila sa pagmandu nagdto sa bag-ong hepe sa Coast Guard Bohol. (rahc/PIA-7/Bohol)

Nagkatapok ang mga sakop sa PCG sa Visayas aron saksihan ang pagtugyan sa katungdanan sa duha la opisyal nga mao nay mangulo sa gipabarug nga substations sa Loay ug Getafe, aron pun-an pa ang pagbantay alag sa luwas nga panakayan sa dagat dinhi sa turismong isla sa Bohol. (rahc/PIA-7/Bohol)