BFP nagpahinumdom: 

Likay sa butane refills

TAGBILARAN CITY, March 13 (PIA)--Padayon pa gihapon nga gipasidan-an sa Bureau of Fire Protection (BFP) ngadto sa mga consumidor ilabi na niadtong migamit sa butane sa pangusina: delikado kini. 

Kini usab samtang may nagpabilin pa gihapon ang mga tawo nga migamit sa butane alang sa ilang pangsugnod, nga nagpagrabe usab sa posibilidad nga may masunog nga mahitabo dala sa mahimong pagbuto niini. 

Ang butane, usa ka matang sa colorless gas nga sugnod nga kasagaran magamit alang sa dinali-ang luto ilabi na sa outdoors camping kay masulod ra sa espesyal nga pagkadesinyo nga canisters. 

Sa nagkalisud na nga panahon, ang barato nga butane nga mapalit sa mga kilidkilid, maoy dali nga magamit tungod sa ka barato niini kon itandi sa Liquefied Petroleum Gas (LPG). 

Niini usab, may mga ilegal na nga nangrefill sa butane canisters sa presyo nga kubos sa P30 alang sa kasagarang tulo ka luto-an, samtang mokabat sa duol sa P900 kon mogamit sa usa ka tangke sa LPG nga molanat ang gamit sa usa ka buwan. 

Sa miaging buwan, naghimo ang Department of Energy (DOE) sa usa ra raid batok sa ilegal nga pagpasulod og LPG sa butane refill canisters dinhi sa Tagbilaran, kini usab hugot nga gisuportahan sa BFP. 

Pahimangno sa BFP, ang butane nga gi-refill sa iyang mga canisters, dili na luwas, ug mosamot pa gayud ang ka delikado niini kon kini gamiton sulod sa balay. 

Gipasabut ni Fire Marshal Shiela Andrade nga ang butane, ilabi na kon girefill sa LPG, delikado sa nipis nga sudlanan, sama sa mga refill canisters. 

Ang butane, kon isulod sa canister, adunay pressure nga dul-an sa 500 kilopascals, samtang ang LPG, may pressure nga gikan sa 500 ngadto na sa 1,000 kilopascals. 

Kon ang nipis nga butane canisters nga gisolda lamang sudlan sa high pressure nga LPG, dako ang posibilidad nga mosi-ad kinig mobuto. 

Adunay giwelding nga tangke nga baga alang sa LPG, pasabut sa BFP, ug gani, may mga safety valves kini nga dili dali madaut. 

Tungod usab niini, sama sa BFP, nanghangyo na ang Department of Energy sa mga lokal nga kagamhanan nga tabangan sila sa pagpatuman sa pagdili na sa pagbaligya ug paggamit sa butane sa dili tukmang sudlanan o canister. (rahc/PIA-7/Bohol)

Delikado ang refill nga butane canisters tungod kay kini nipis ug gisulda lamang samtang ang gisulod niini, liquefied petroleum gas (LPG) nga may taas nga pressure hinungdan nga ang tinuod nga sudlanan niini, baga nga tangkeng puthaw ug giwelding. Gikampanya karon sa BFP pinaagi sa pagpangulo ni FSupt Sheila Andrade ang pagdili na sa butane refills kay maka-ingon sa sunog. (rahc/PIA-7/Bohol)