FDA, nipasidaan sa publiko 

batok sa pekeng paracetamol 

TAGBILARAN CITY, Marso 27 (PIA)--Nipasidaan ang Food and Drug Administration (FDA) sa publiko batok sa midagsang nga mga pekeng paracetamol nga gigamit ang putos sa brand nga Biogesic. 

Sa FDA Advisory No. 2018-081 nga may petsang Marso 16, gi-lista sa buhatan ang pipila ka kalahian sa tinuod kun itandi sa pekeng paracetamol, partikular na sa kolor, hitsura sa print, ug pattern sa disenyo sa mga tableta. 

Migawas sa pagtuon sa FDA kauban sa Marketing Authorization Holder ug Unilab Laboratories nga may peligrong dala sa panglawas ang mga pekeng Biogesic nga mikatap karon. 

Pahinumdom pa sa FDA sa publiko, magbinantayon gayud ug mopalit lamang sa mga establisimyentong lisensiyado sa ilang ahensiya. 

Nipasidaan usab ang FDA sa mga magbaligya og pekeng paracetamol nga mapahamtangan sila og tukmang silot. 

Gidili ang importasyon ug pagbaligya sa mga pekeng tambal ubos sa Republic Act No. 9711 o ang Food and Drug Administration Act of 2009, apil na usab sa Republic Act No. 8203, o ang Special Law on Counterfeit Drugs. 

Mahimong makig-alayon sa FDA pinaagi sa ilang e-mail address nga report@fda.gov.ph, o pinaagi sa ilang online reporting facility nga eReport sa www.fda.gov.ph/ereport o di kaha motawag lamang sa numerong (02) 809-5596 aron isumbong ang mga nagbaligya og pekeng paracetamol. (ecb/PIA7-Bohol). 

=================

BSP, nagpagawas og 

mga bag-ong sensilyo 

TAGBILARAN CITY, Marso 27--May bag-ong hitsurang makita sa mga bag-ong sensilyong gipagawas karon sa Bangko Sentral ng Pilipinas (BSP) nga maghatag og mas piskay nga hitsura ug mas maayong seguridad sa mga sensilyo. 

Sa pahayag sa BSP, nagsugod na ang sirkulasyon sa nasod sa tibuok serye sa New Generation Currency (NGC) coins nga 10-Piso, 5-Piso, 1-Piso, 25-sentimo, 5-sentimo, ug 1-sentimo diin may bag-o kining disenyo ug hinimo sa nickel-lated steel. 

Sa usa ka parte sa sensilyo, makita ang pipila ka mga ‘Philippine endemic specie’ sa mga buwak, kauban sa bag-ong logo sa BSP. 

Sa pikas parte usab makita ang mga nawong sa mga bayani sa Pilipinas. 

Sa piso, nagpabilin ang nasudnong bayani nga si Dr. Jose Rizal ang naka-kulit niini. Si Andres Bonifacio usab ang naa sa P5, ug si Apolinario Mabini sa P10. Samtang stylized nga bandila sa Pilipinas ang makita sa 25, 5, ug 1 sentimo. 

Gipasabot sa BSP nga gi-alisdan nila ang materyal sa mga sensilyo aron dili kini dali tay-an ug mangitom. 

Ang metallic composition sa NGC coins giusab aron masumpo ang ilegal nga pagtunaw ug pagkuha sa mga mahinungdanong metal niini. 

Matud pa sa ahensiya nga pinaagi sa dugang security features sa NGC coin series, dili na daling masundog ang mga sensilyo pinaagi sa tradisyunal nga proseso sa counterfeiting. 

Sa pagkakaron, mahimo pa gihapong gamiton ang mga daang disenyo sa mga sensilyo, dungan sa sirkulasyon sa NGC coins. (ecb/PIA7-Bohol) 

Ang tibuok serye sa New Generation Currency (NGC) nga 10-Piso, 5-Piso, 1-Piso, 25-Sentimo, 5-Sentimo, ug 1-Sentimo nga gipagawas sa sirkulasyon sa BSP. (hulagway sa BSP FB) 

===============

Nagpadayong upgrading sa GCGMH, 

gisusi ni Sen. JV Ejercito 

TAGBILARAN CITY, Marso 27 (PIA)--Personal nga gisusi ni Senador JV Ejercito ang nagpadayong upgrading sa Gov. Celestino Gallares Memorial Hospital (GCGMH) Martes sa buntag. 

Inubanan nilang Gob. Edgar Chatto ug Provincial Administrator Ae Damalerio, ang senador gihatagan og update ni GCGMH Chief Dr. Mutya Kismet Tirol-Macuno sa kalamboan sa gi-trabaho sa maong tambalanan. 

Ang upgrading sa maong tertiary hospital sa Bohol ngadto sa 500-bed capacity hospital gitabangan pinaagi sa lehislasyon ni Cong. Rene Relampagos sa Ubos Balay Balaoranan ug ni Sen. Ejercito sa Sanado. 

Ang P2.2 bilyong bag-ong pasilidad sa GCGMH nga himuong ‘specialty medical center’ napondohan na. 

Si Sen. Ejercito nga maoy chair sa Committee on Health and Demography mi-suporta sa pag-pundo sa maong tambalanan, sa tabang nilang National Economic and Development Authority (NEDA) Kalihim Ernesto Pernia, Department of Budget and Management (DBM) Kalihim Benjamin Diokno ug Department of Health (DOH) Kalihim Francisco Duque. 

Si Ejercito nga usa sa mga principal sponsors sa “Free Higher Education for All Act” niabot sa lalawigan niadtong Lunes diin mihatag kini og commencement address ngadto sa 530 ka mga tinun-an sa Bohol Island State University (BISU) Candijay Campus Lunes sa buntag ug milahos sa BISU Bilar Campus diin mihatag usab kini og mensahe ngadto sa 1,050 ka nitapos sa maong tunghaan. 

Martes sa buntag, gipangunahan ni Ejercito ang ground-breaking ceremonies sa P20 milyong BISU gymnasium ug P20 milyong BISU school building sa BISU Balilihan Campus. 

Si Ejercito maoy commencement speaker sa 156 ka tinun-an sa graduation rites sa BISU Balilihan Campus human sa ground-breaking ceremony ug mi-dretso ngato sa dakbayan sa Tagbilaran alang sa graduation ceremonies sa kapin 1,900 ka tinun-an sa BISU Main Campus. (ecb/PIA7-Bohol).