NDRRMC nagpagawas og

"Blue alert" sa Kwaresma

TAGBILARAN CITY, March 27 (PIA)--Giisa sa National Disaster and Risk Reduction Management Council (NDRRMC) ang blue alert ngadto sa mga Regional DRRMC ug sa Office of the Civil Defense aron hingpit nga ma-andam ang dinali-an nga aksyon kon may mahitabo man ugaling atul sa semana santa.

Sa Memorandum Number 28 series of 2018 nga gipagawas ni NDRRMC Administrator ug Undersecretary Ricardo Jalad, gipasabut niya nga ang pagdagsang sa mga turista ug sa bagang duot sa katawhan sa nagkadaiyang lugar diin mamahimong sentro sa mga kalihukan sa Kwaresma, gipandong na sa NDRRMC ang blue alert sugod sa alas 8:00 sa buntag sa Marso 29 ngadto na sa Abril 2, 2018.

Kinim atud pa ni Usec Jalad, aron ma maximize and pagcoordinate ug pag monitor ug mapahimutang na ang tukmang pagpangandam alang sa Mahal nga mga Adlaw.

Ilawom sa blue alert, gipaabut nga ikapahibaw ang pagdeklara sa pagtaas sa alert status, mapagawas na ang nagkadaiyang instructions ngadto sa mga Regional, Provincial ug municipal DRRMCs aron kahimo-an na sa Pre-Event Risk Assessment, ikapahimutang sa way bugto nga duty ang mga sakop sa kasundalohan, kabomberohan, coast guard ug kapolisan.

Niini, gipaabut usab ang mga taho gikan sa mga OCDs ug lokal nga DRRMCs ilabi na sa mga lakang- pagpangandam sa bisan unsang hulga nga natumbok, pagpasa subay sa na-kasabutang reporting protocols lakip na ang mga situational reports aron mahatagan og aksyon kon may kinahanglang og nasudnong direksyon ang mga lokal nag panghitabo.

Sa Bohol, ilabi na sa pagpangandam sa mas daghan pang turista nga ang rumbo unta ang nasira nga resorts sa Boracay, doble ang pangandam nga angay himoon sa mga tinugyanan ilabi na sa seguridad ug komportable nga pag-puyo sa mga suroyanan sa Bohol.

Gani, sayo ning semanaha, kalit nga gibisita ang isla sa Bohol ni Department of Transportation Secretary Art Tugade.

Gisuhid niya ang pantalan sa Tagbilaran ug nakigtagbo sa mga sakop sa Inter-Agency team nga nagpadagan sa Passenger Assistance Desk didto.

Gisaksihan usab sa kalihim ang gipahimutang nga security measures sa pantalan nga amoy pultahang kasudlan sa mga turista ining tamak sa Bohol.

Gisubay usab niya ang ang kahimtang sa passenger lounge aron suta-on kon may panginahanglan ba nga ipaneguro pa ang kahamugaway niini, samtang gitanda usab niya ang Pantalan sa Tubigon aron subayon ang mga lakang alang sa seguridad nga gipahimutang didto.

Samtang nagpa-ingon sa Tubigon, gibadlong usab sa kalihim ang usa ka truck nga depasahero-an nga gawas nga nagkarga og subra sa angay, mibuga usab og itum nga aso.

Sa Tubigon, gisaka ni Tugade ang usa ka barko ug gisugyot nga ang mga salvavida adto na ibutang duol sa makab-ot sa mga pasahero aron kalikayan ang kaguliyang kon may panginahanglang mokuha sa abayan sa paglangoy. (rahc/PIA-7/Bohol)

Sa wala pa man ikapagawas sa NDRRMC ang blue alert aron makapangandam ang tanan sa kinahanglang seguridad sa Kwaresma, mibisita na si Department of Transportation Secretary Art Tugade sa Bohol aron suta-on ang ga napahimutang nga mga seguridad sa pantalan ug ang kahamugaway niini. (PIA Bohol/ Foto: Duterte 2016 Bohol Movement)