"Pa-morningan" nga videoke 

session, giduso nga i-bawal na 

TAGBILARAN CITY, March 14 (PIA)--Maihap na lang ang adlaw sa mga hilig magbuntagay og videoke human gisugdan sa House Committee on Public Order and Safety ang pagtuki sa balaodnon nga magtakda og oras sa mga residential areas. 

Ubos sa House Bill 1035 nga giduso ni Quezon Representative Angelina Tan, limitahan gikan alas-otso sa buntag hangtod alas-diyes sa gabii ang paggamit og videoke ug uban pang sound amplifying equipment sama sa kusog nga mga speakers. 

Ang bisan kinsang molapas sa 50-feet nga distansiya gikan sa source o tinubdan – indibidwal man, balay o business establishment, pamultahon og P1,000 ug mahimong mabilanggo og hangtod unom ka buwan. 

Ubos sa maong balaodnon, kinahanglan na sa mga residente nga mokuha og permiso sa barangay sa dili pa mogamit og videoke kun buntag. 

Sa dili pa aprobahan ang videoke permit, kinahanglang inspeksyonon usab sa mga opisyal sa barangay ang balay sa residente ug kun unsang mga istraktura ang naa sa 50-metrong palibot niini. 

Kasagarang tinubdan sa away ang videoke ug makadaot usab sa kahimsog ang noise pollution nga dala niini sigun pa ni Tan nga usa usab ka doktor. 

Hisgotan pa sa mga magbabalaod kun angay i-apil sa maong balaodnon ang mga commercial areas ug kun unsa kakusog ang tugtog sa videoke nga itugot. 

Una nang gi-awhag ni Presidente Rodrigo Duterte ang mga lokal nga kagamhanan nga aksyonan ang mga "pa-morningan" nga videoke session. 

Nagpatuman si Duterte og ordinansa kalabot niini niadtong mayor pa siya sa syudad sa Davao. (ecb/PIA7-Bohol) 

===============

5-day Sandugo Agri-

Fair, gitakda sa Hulyo 

TAGBILARAN CITY, March 14 (PIA)--Usa sa mga highlight sa kasaulogan sa Sandugo Festival 2018 karong umaabot Hulyo mao ang lima ka adlaw nga agri-fair. 

Ipahigayon kini sa Hulyo 17-21, 2018 diin ipasundayag ang mga produkto ug abot sa mga mag-uumang Bol-anon. 

Kining agri-fair tradisyonal na nga gina-apil sa mga kalihokan sa usa ka buwan nga kasaulogan sa Sandugo festival matag tuig sa buwan sa Hulyo. 

Tinguha niining festival nga mapa-usbaw, i-apil sa promosyon ug marketing sa agro-tourism nga paningkamot sa lalawigan sa Bohol. 

Usa sa highlight sa maong agri-fair mao ang paglusad sa talagsaong brand nga gitawag og “Tatak Bohol”. 

Ang maong brand maghatag og kahigayonan sa pag-showcase sa mga produkto ug serbisyong Bol-anon ug gilaoman nga mag-abli og oportunidad alang sa market research activities. 

Ang “Tatak Bohol” brand magtanyag sa mga produkto ug abot nga ‘high-quality agro-fishery products’ nga nakapasar sa food safety standards. 

Usa usab kini ka portunidad nga mapakita ang paningkamot sa pag-upgrade sa teknolohiya sa pagpanguma nga gigamit sa mga mag-uuma ug ubang negosyante sa ilang nagkadaiyang umahan. 

Sigun pa ni Assistant Provincial Agriculturist Larry Pamugas, ang maong agri-fair mahimong usa ka major marketing ug promotions activity diin ipang-display ang mga presko, organic, agricultural products ug uban pang abot sa uma. 

Ang ubang kalihokan sa Sandugo Festival 2018 naglakip usab sa: Sandugo Kick off (Hulyo 1), Miss Bohol Pageant Talent Night (Hulyo 7), Miss Bohol Pageant (Hulyo 14), Song Festival (Hulyo 20), Street Dancing (Hulyo 21), Bohol Day (Hulyo 22) ug Tigum Bol-anon Tibook Kalibutan (TBTK) sa Hulyo 26-28, 2018. (ecb/PIA7-Bohol)