Duha ka Lupon sa Bohol

makigtigi sa LTIA finals

TAGBILARAN CITY, May 8 (PIA)--Duha ka barangay adjudication councils, o konseho nga gihulma aron mohusay sa mga kaso nga mahimo rang husayon sa kabarangayan ug aron dili na makakulgot sa korte, and ming abante na sa nasudnong pagtigi sa labing hawod nga Lupong Tagapamayapa sa Incentive Awards (LTIA) sa 2018.

Ang Lupong Tagapamayapa (LT) sa Can-opao Jagna una na nga nahukmang mananaug sa regional search alang sa 1st nagdto sa 3rd class municipalities samtang ang LT sa Nahawan Clarin mao usab ang nanghawod sa 4th ngadto sa 6th class sa regional competitions ug mao nay morepresentar sa Central Visayas sa national finals, segun sa a Memorandum nga gipagawas sa Department of Interior and Local Government (DILG).

Sa usa ka Memorandum ngadto  sa City ug Provincial Directors, si DILG 7 Regional Director Atty Rene Bordeos, CESO III mihingalan sa mga mananaug nga napili sa Regional Awards Committee human masubay ug matandi sa usag usa niining tuiga.

Lakip sa mga mananaug sa regional nga search ang LT sa Barangay Pajo sa Lapu-lapu City sa Cebu alang sa Highly Urbanized City ug ang LT sa Barangay Valladolid, Carcar City sa Cebu alang sa Component Cities Category.

Niining tuiga, ang ilawom sa Lupong Tagapamayapa Chairman nga si Arsenio Degamo, ang Nahawan mitikang sa mas maayong kahimtang gikan sa first runner up position sa miaging tuig human sa LT Barangay Bingag Dauis nga maoy mananaug alang sa 4th nagdto sa 6xth class sa 2017 provincial ug gani nidaug usab sa regional finals.

Sa milabay nga 2016, ang Nahawan 2nd runner up usab sa 4th ngadto sa 6th class Lupons sa Provincial Category, matud pa ni Clarin Municipal Local Government Operations Officer (MLGOO) Jose Jekeri P. Taningco.

Gibutyag ni Taningco nga mas sayon ang pagdaug sa Nahawan tungod sa ilang pagtukod og Purok Justice System, subay usab sa agenda sa Provincial Government's nga purok empowerment.

May dali silang sistema sa paghibaw-anay sa Lupon Chairman kon may iduso nga sumbong sa Lupon Secretary.

Sa nahawan, magtukod usab sila og komitiba nga unang mangimbistigar, mangitag saksi sa hitabo ug makigsulti sa mga hingtungdan samtang laghimo usab ang chairman sa iyang kaugalingong imbestigasyon.

Sa Purok Justice System mas dali ang pagkuhag mas piho nga detalye sa kaso tungod kay kaila ra sila, dugnag ni Taningco.

Sa panahon sa tinghusay, dali na nga timbangon sa Lupong Tagapamayapa ang kaso kay mahibaw-an na nila ang lakang nga himoon, dugang niya.

Pa lamanohon usab sa Chairman ang mga nagkasohay sa dili pa magsugod ang husay, ug kasagaran, masolbad ra dayon ang gihusay, matud sa MLGOO.

Sa laing bahin, ang LT sa Can-opao maningkamot nga makakuha sa ikatulo nga pagkapili sa labing hawod nga LTIA aron mamahimo na silang ikadeklara nga Hall of Famer. 

Segun sa mga tinubdan, ang LT Can-opaw nga gipangulohan ni Chairmen Jocelyn Pagtanac, nakakuha nag duha ka national nominations human makaabut sa regional ug nasundong finals.

Gawas na mamahimong Hall of Famer, mapamatud-an usab sa LT Can-opao nga mahimo ra nga kapalu-agan ang ngahuot nga mga korte pinaagi sa paghimo sa mga tighusay sa barangay.  (rahc/PIA-7/Bohol)

 Kini ang LT Can-opao Jagna uban ni Mayor Fortunato Abrenilla samtang ilang gidawat ang tropeyo ug ganti gikan sa mga opisyales sa Bohol nga gitunol ni Gob Edgar Chatto niadtong 2017. (rahc/PIA-7/Bohol)