Task Group Bohol, ipakatap 

alang sa Brgy. ug SK eleksyon 

TAGBILARAN CITY, Mayo 8 (PIA)--Ipakatap sa Philippine National Police (PNP) ang ilang special task force alang sa ipahigayong piniliay sa Baranggay ug Sangguniang Kabataan (SK) karong Mayo 14, 2018. 

Gipangunahan ni Bohol Police Provincial Office (BPPO) Director SSupt. Angeles Geñorga Jr, ang over-all commander sa Task Group Bohol ang inisyal nga send-off ceremony sa labaw 500 ka personahe sa PNP, Armed Forces of the Philippines (AFP) ug Philippine Coast Guard (PCG) aron maghatag og seguridad sa umaabot eleksyon. 

May kinatibuk-ang 2,500 ka pwersa sa PNP, AFP ug PCG gikan sa lalawigan sa Bohol ug Police Regional Office (PRO) 7 ang gitakdang ipakatap alang sa luwas ug makiangayon nga piniliay sa Lunes. 

Ang maong send-off ceremony gipahigayon sa Plaza Rizal ning syudad diin gi-bendisyonan ang mga tropa human sa gipahigayong misa sa St. Joseph’s Cathedral ganinang alas 7:30 sa buntag. 

Gitambongan kini nila Provincial Administrator Ae Damalerio nga nag-representar ni Gob. Edgar Chatto, City Administrator Edi Borja nga nag-representar ni Tagbilaran City Mayor John Geesnell Yap II, Commission on Elections (Comelec) 7 acting regional director Atty. Veronico Petalcorin, Provincial Election Supervisor Atty. Eliseo Labaria, Lt. Col. Joel Malig sa 47th Infantry Battalion, Lt. Ericson Laza sa PCG ug Acting Bise Gobernador Benjie Arcamo. (ecb/PIA7-Bohol). 

Send-off ceremony sa Task Group Bohol nga gipahigayon sa Plaza Rizal, syudad sa Tagbilaran kagahapon, Mayo 8, 2018.