Pag-amendar sa SSS Charter, EO
magpatunhay sa SSS pension fund

TAGBILARAN CITY, May 16 (PIA)--Hangtud nga mapausab na ang Social Security Law, maglisud pa ang Social Security System (SSS) sa pagtuman sa gisaad nga dugang benepisyo alang sa mga SSS pensioners. 

Ug matud pa sa SSS, mahimo lamang nga ikapagawas ang dunga usa ka libo sa pensyon pinaagi sa pag-usab sa SSS Charter subay sa Executive Order (EO) nga ipagawas sa President o ang pagpasupot sa gisugyot nga amendment sa Republic Act 8282 o ang Social Security Law of 1997. 

Sa gipadayag ni SSS President ug Chief Executive Officer Emmanuel F. Dooc, gipatin-aw niya nga ang aghat sa mga pensyonado nga ipagawas na ang ikaduhang hugna sa P1,000 nga dugang benepisyo sumala sa gisaad ni Presidente Rodrigo Duterte mahimo lamang kon hain man sa duha ang mahitabo. 

Una na usab nga gipanigil sa mga pensyonado ang gisaad nga usa ka libo nga usbaw sa binuwan pensyon alang sa 2019, inay sa 2022 segun sa unang gipasabut sa Presidente. 

Apan gitataw ni Dooc nga ang SSS walay gahum nga mag-dugang sa mga binuwan nga tampohon o ang kantidad sa binuwan nga madawat sa mga pensyonado nga miretiro nas trabaho sa pribadong sektor. 

Gidason usab sa SSS nga ilang tumong ang pagseguro nga makapagawas sa ikaduhang hugna sa pensyon sulod sa termino ni Presidente Duterte, nga mahimo pang mahitabo sa dili pa motapus ang 2022. 

Mismo si Presidente Rodrigo Duterte mipahibaw niadtong Enero 2017 sa pagka-aprobar sa P2,000 nga dugang pension ug gani, gihatag na ang unang P1,000 niini niadtong tuiga. 

Gilaraw nga ang ikaduhang hugna sa laing P1,000, adto na ihatag sa 2022, human usab kini mapahimutangi sa usa ka malungtarong programa'ng pinansyal nga makapalahutay sa pundong pensyon sa nasud. 

Apan bisan pa sa P33 bilyones nga nagasto sa SSS alang sa dugang tag P1,000 nga pension niadtong 2017, matud ni Dooc nga mas dako pa sa P33 bilyones and pundo nga magamit sa sunod nga hugna. 

Nagkadaghan ang pensyonado ug kini gibanabana nga naa sa 100 ka libo sa matag tuig. 

Bisan pa sa maayo nga koleksyon nga makasapal sa nagkadaku usab nga galastohan sa pensiyon, dili kini ikasarang sa pila ka tuig nga lanat sa hinatagay sa pension. 

Gitumbok sa SSS nga misaka og 10.6 porsyento gikan sa P144 billion sa 2016 ang nakolekta sa 2017. 

Mikabat sa P159 bilyones ang koleksyon sa SSS sa 2017 apan gilantaw nila nga sa 2018, usbaw sa 18 ngadto sa 20% ang buot nilang abton nga koleksyon gikan sa mga employers ug indibidwal nga mga sakop niini. 

gitataw usab sa SSS nga aron may kasaligang tinubdan sa suporta sa ikaduhang hugna sa pensyon, kinahanglan kining ubanan sa usabaw sa kontribusyon o adjustment sa minimum ug maximum nga monthly salary credits sa SSS.
 

Niining paagi, P7 bilyones ang makolekta sa SSS sa katapusang quarter sa 2018 bisan kon 1.5 % lamang ang usbaw sa contribution rate, ug may adjustment sa minimum salary credit gikan sa P1,000 ngadto sa P4,000, ug maximum salary credit gikan sa P16,000 ngadto sa P20,000 nga ikapatuman sa Octobre pohon.
 

Importante, matud pa sa SSS ang pag-usbaw sa kontribusyon aron mapalig-on ang pundo sa SSS. 

Segun sa taho, human ikapatuman ang unag hugna sa dugang pension sa 2017, ang pundo sa SSS nakuhaan og balig napulo ka tuig. 

Kon ipatuman ang ikaduhang hugna sa pension nga walay mekanismong magpundo alang niini, ang pundo igo lamang taman sa 2026, dugang sa SSS. (rahc/PIA-7/Bohol) 

Sa nagkadaghan nga tawo nga mokuha sa pension matag tuig ug sa wala pasy mekanismo sa pagpadugang sa pension funds sa SSS, dili magdugay ang pagkahurot na sa pundo kon ipatuman dayon ang laing P1,000 nga umento sa pension, segun pa sa kadagkoan sa SSS. (rahc/PIA-7/BOhol)