Katawhan giaghat hugopan 

ang Int'l AIDS Candlelight 

Memorial karo'ng Mayo 18 

TAGBILARAN CITY, May 16 (PIA)--Giaghat ang tanan nga hugopan karong Biyernes pohon, Mayo 18, ang International AIDS Candlelight Memorial dinhi sa Bohol adto sa Plaza Rizal, alas 5:00 nagdto sa alas 8:00 nga pangunahan sa National AIDS and Sexually Transmitted Infection Prevention and Control Program (NASPCP). 

Ang pagduslit sa mga kandila, usa sa mga lakang nga natumbok aron handumon, suportahan ug pangunahan ang pagduso sa katuyo-an nga palihokon ang mga komunidad. 

Kini aron sayran ang kamatuoran kabahin sa Acquired Immune Deficiency Syndrome (AIDS) aron malikayan, ug kadtong may Human Immunodeficiency Virus (HIV) nga mabuhing malinawon ug may dignidad, matud ni Provincial Health Officer Dr. Reymoses Cabagnot. 

Sa dinungan nga AIDS Candlelight Memorial nga misagop sa tema nga “Reflecting on our Past, Preparing for our Future,” gi-lauman usab nga mamahimong usa ka lakang sa kahiusahan sa tanan aron magun-ob na ang paril nga nagpabuwag sa komunidad sa mga tawo nga napositibo sa HIV. 

Tumong usab niini nga wad-on na ang diskriminasyon, samtang ipasubang ang paglaum sa mga kabatan-onan nga apektado na niini ug mahadlok nang makig-ambit sa komunidad, dugang ni Dr. Cabagnot. 

Niini, ang International AIDS Candlelight Memorial unta magsilbi nga kampanya aron palihokon ang komunidad ug hiusahan ang kampanya batok sa HIV ug AIDS. 

Segun pa sa Department of Health (DOH), bisan pa nga may libre na nga pagpatambal sa HIV AIDS, miabut gihapon sa 500 ka tawo ang namatay matag tuig tungod niining sakita. 

Niadtong 1984, mikabat na sa 53,000 ka Pinoy ang nataptan sa HIV samtang gikan sa 2010 ngadto sa 2016, namatikdan ang 140% nga pagsaka sa impeksyon sa HIV. 

Gani, sa Pebrero lamang ning tuiga, matud sa DOH nga may 871 ka bag-ong kaso sa HIV ang namatikdan ug 90% niini tungod sa pagpakighilawas. 

Sa 871 ka bag-ong kaso, 723 o 86% niini nakuha tungod sa pagpakighilawas sa mga lalaki sa kaparehas nga lalaki, segun sa taho sa DOH. 

Sa labing bag-o nga taho sa DOH, aduna nay 2,276 ka kaso sa HIV positive sa mga kabatan-onan nga nagpanuigon sa 15-24. 

Kini karon ang buot nga abton sa kampanya, aron pakunhoron ngadto na sa wad-on ang hulga sa HIV AIDS sa katilingbang Pilipinhon. (rahc/PIA-7/Bohol) 

PAGDAGKOT ALANG SA MGA BIKTIMA SA AIDS. Paghandumon sa tibuok kalibutan pinaagi sa International AIDS Candlelighting Memorial ang mga biktima sa HIV AIDS samtang gilauman nga pukawon niini ang komunidad aron aktibo nga batukan ang pagkatag sa sakit nga nakadaut na sa relasyon sa komunidad. (PIABohol/hulagway sa google)