Pagpili sa paggatas sa mga Benepisaryo 

sa LETS HELP Gikalipay sa mga tinugyanan

TAGBILARAN CITY, May 29 (PIA)—Gikan sa yano nga pagpang-apud-apod sa mga kabaw aron may ika-abag sa umahan ang mga mag-uuma, karon, nakita sa Buhatan sa Provincial Veterinarian (OPV) nga dili lang pangdaro apan gisagop na usab sa mga Bol-anon ang panggatasan. 

Gani, wala magtuo si PVeterinarian Dr. Stella Marie Lapiz nga motapon ang ilang mga benepisaryo sa animal dispersal nagdto na sa pagpanggatas, dala sa kasagarang kinaiya sa tigpanghayupan dinhi. 

Pinaagi sa pagtambayayong sa Kagamhanang Probinsyal pinaagi sa OPV ug sa Heiffer Project International, kapin sa 3,000 ka kabaw ang ilang naapud-apod sa mga mag-uumang Bol-anong ilawom sa us aka programa. 

Ang programang Livelihood Enhancement Towards Sustainable Human and Environmental Paradigms for Bohol (LETSHELP Bohol) mituo nga ang mag-uuma nga may igdadaro nga kabaw, makatigum na sa iyang isuhol unta sa pagpadaro ug ipakaon sa motrabaho sa iyang basak. 

Gibutyag sa mga tinugyanan sa OPV nga niadtong panahona, ang us aka adlaw sa pagdaro mosuhol na og tag P250, pun-an pa sa pagpakaon sa nagtrabaho sa basak.

Kon may kabaw na, matigum na ang pangsuhol samtang modako ang abut sa uma kay mag kasaligan na man nga magtikad, ug may dali na nga kadangpan kon may panginahanglang mga bugwaron sa natad, matud ni Dr Lapiz.

Ang kabaw nga gipa-alimahan sa mag-uuman, kon manganak, iya na nga ikabayad ang nati ug sa kadugayan, iyaha na nga permanente nga panag-iyahon ang kabaw, dugang sa Provincial Veterinarian. 

Apan human sa pipila ka tuig ug human nikabat na sa 3,000 ka kabaw ang naghatag ug nagpadayon pa ang alimahanay, namatikdan sa OPV nga may mingsagop na usab sa paggatas sa kabaw. 

Pinaagi sa Philippine Carabao Center, napauso na ang paggatas sa kabaw samtang kini itugway na lamang sa landong. 

Mokabat matud pa sa OPV ngadto sa tulo ngadto sa upat ka litro nga gatas ang ilang mahipos lahi pa sa gatas nga ipasuso sa nati. 

Niini, nalipay si Dr Lapiz tungod kay kini na usab ang direksyon nga gisubay sa nasudnong kagamhanan sa pagpasaka sa supply sa gatas nga kasagaran gipamalit na sa Pilipinas didto sa gawas. 

Nalipay kita, tungod kay gawas nga nakatabang ang proyekto sa pagpanghatag og kabaw, sila na karon nga mga mag-uuma ang mihukom nga maggatas aron may ikadugang sa ilang mga kita, saysay ni Dr. Lapiz. 

Mao usab kana ang tumong sa kagamhanan: ang paghimong kasaligan nga tinubdan sa kita ang panguma, aron usab kapundohan ang dako nga panginahanglan sa pagkaon ug nutrisyon sa nasud.

Tumong sa Department of Agriculture nga ang Bohol himoong sentro sa paggatas sa tibuok nasud. (rahc/PIA-7/Bohol)