PSA nangita og trabahante nga

mopadagan sa FIES '18 survey

TAGBILARAN CITY, May 9 (PIA)--Buksan na usab sa Philippine Statistics Authority (PSA) ang laing hugna sa Family Income and Expenditures Survey (FIES) ning 2018 ug manginahanglan sila og mga tawo alang sa pagpadagan ning survey.

Matud ni Provincial Statistics Officer Jessamyn Anne Alcazaren, buksan na usab nila ang pagpanawat sa mga  enumerators, reserve enumerators, team supervisors, manual processors ug data encoders alang lamang sa nahisgutang survey sugod karon hangtud sa alas 5:00 sa hapon sa Mayo 25, 2018.   

Mokabat sa 51 ka enumerators, 5 ka reserve enumerators, 5 ka team supervisors, 8 ka manual processors ug upat ka data encoders and gikinahanglan aron mapadagan sa PSA ang survey, dugang ni Alcazaren.

Ang PSA mosugod nag dawat sa mga applications karon aron ma-interview sa Mayo 29-30, 2018.

Hinuon, gikinahanglan nga ang mag aplikante, labing menos nakahuman og duha ka tuig sa kolehiyo, interesado nga mopailawom sa pagbansay, mahimong motrabaho nga halayo sa balay, makakaya nga mobaktas og layo og kon babaye, kinahanglang dili buntis, aron makahimo sa trabaho.

Dugang pa, kinahanglang ang mga aplikante hingamigohon, manggitinahuron ug may abilidad nga dali rang makasakay sa kaestorya, kinahanglang molupyo usab sa lungsod kon diin ang mga sample barangay nga maapil sa enumeration alang sa iyang kasayon.

Kinahanglan usab nga siya makasultig binisaya ug makasabut sa inenglis tungod kay ang mga materyales sa bansya nga himoon, gisuwat sa inenglis.

Gawas niana, kinahanglan pa usab nga makapasar sa pasulit nga ipatuman alang sa nga aplikante, butyag ni Alcazaren.

Kadtong mga interesado, kinahanglang moduso sa Application Letter nga ubanan sa Accomplished Personal Data Sheet o Resume nga may labing bag-o nga ID picture, may ikapakita nga transcript of Records o Certificate nga magmatud sa grado, ug kon mahimo, Certificate of Work Experience.

Kining tanan, kinahanglang ihatud o ipa koryo nagdto kang: Jessamyne Anne C. Alcazaren, Provincial; Statistics Officer, PSA Tagbilaran, 3/Floor Galeria Luisa, Gallares Street, Tagbilaran City. (rahc/PIA-7/Bohol/PSA) 

Laing hugna na usab sa Family Income and Expenditures Survey karong tuiga ang manginahanglan sa mga limilihok ug niini, manawat na usab ang PSA sa mga trabahante alang ning programa. (PIABohol)