Compensation benefits sa pribadong sektor, 

gipatas-an ni Presidente Duterte 

TAGBILARAN CITY, Mayo 15 (PIA)--Gipatas-an ni Presidente Rodrigo Duterte ang employees’ compensation (EC) benefits sa mga empleyado sa pribadong sektor ug ang career’s allowance sa mga nagtrabaho sa pampublikong sektor. 

Ubos sa Executive Order No. 54 nga gilagdaan sa Presidente niadtong Mayo 8, gi-aprobahan niini ang P1,150 across the board increase sa EC monthly disability pension sa tanang permanent disability pensioners ug mga kwalipikadong benepisyaryo sa pampublikong sektor. 

Nakalatid sa maong EO nga gikan P575, mahimo nang P1,000 matag buwan ang career’s allowance sa EC permanent disability pensioners sa pampubliko ug pribadong sektor. 

Gipun-an usab ni Duterte ang reimbursement alang sa professional fees sa mga doktor ubos sa EC medical benefits alang sa mga empleyado sa pribadong sektor. 

Ang bag-ong rate alang sa inadlaw nga pagbisita sa doktor sa ward, P400 matag adlaw sa general practitioner, ug P600 alang sa espesyalista, samtang P1,600 ang kantidad sa maximum confinement alang sa general practitioner, ug P2,400 alang sa espesyalista. 

Ubos usab sa maong EO 54, gisakaan ang reimbursement amount alang sa physical therapy sessions ubos sa EC medical benefits alang sa mga empleyado sa pribadong sektor gikan P65 matag session ngadto sa maximum nga P500 matag session. 

Samtang ang kantidad sa Temporary Total Disability Benefits (TTD) alang sa pribadong sektor gipasakaan usab gikan sa minimum daily income benefit nga P10 ngadto sa P110 ug gikan sa maximum daily income benefit nga P200 ngadto na sa P480. 

Gimanduan usab ni Duterte ang Social Security System (SSS) nga padayong ipatuman ang P2,000 minimum OC monthly disability ug survivorship pension sa pribadong sektor. (ecb/PIA7-Bohol).