Patakaran sa pag-renew sa rehistro 

sa contractor, gipagawas sa DOLE 

TAGBILARAN CITY, Mayo 15 (PIA)--Alang sa mas paspas nga pag-proseso og aplikasyon sa pag-renew sa rehistro sa labor contractors, nagpagawas ang Department of Labor and Employment (DOLE) og patakaran nga nagtakda alang sa pag-aproba og aplikasyon. 

Gitin-aw sa Labor Advisory No. 06 ang patakaran sa pag-renew sa rehistro sa contractor ubos sa Department Order No. 174, series of 2017, diin aksiyunan dayon ang pag-renew og aplikasyon sa labor contractor nga walay inspection findings o walay naka-pending nga kaso. 

Ang aplikasyon alang sa renewal sa rehistro sa contractor nga nagsunod sa mga gitakdang patakaran ubos sa Section 21 sa D.O. 174-17 aksiyunan sa DOLE sigun sa kasamtangang proseso. 

Nakalatid usab sa advisory nga dili dawaton ang aplikasyon alang sa renewal sa rehistro sa kaso nga may inspection findings o may naka-pending nga kaso ug naisyuhan og pinal nga Compliance Order. 

I-proseso lamang ang aplikasyon kun iduso ang mga pagmatuod sa pagsunod sa compliance order o ang kamanduan nga na-dismiss na ang kaso. 

Kun ang contractor may inspection findings o may naka-pending nga kaso ug na-isyuhan og Compliance Order apan nakaduso og apila sa Labor Secretary, aksiyunan sa DOLE ang ilang aplikasyon sa renewal sa registration base sa kasamtangang proseso. 

I-kanselar sa buhatan sa DOLE ang pag-proseso sa rehistro sa contractor kun nahimong pinal nga ipatuman ang resolusyon sa Labor Secretary. 

Gi-alisdan sa D.O. 174-17, o ang patakaran nga nagpatuman sa Articles 106 hangtod 109 sa Labor Code, base sa pagka-amyenda, ang D.O. 18-A nga gitugotan ang labor-only contracting ug ang nahimong hinungdan sa pagkatap sa ‘endo’ ug uban pang matang sa ilegal nga kontraktuwalisasyon. (ecb/PIA7-Bohol).