SRP sa mga produkto, 

gipabantayan sa DTI 

MANILA, Mayo 28 (PIA)--Gipahugtan pa karon sa Department of Trade and Industry (DTI) ang pagbantay sa presyo sa mga nag-unang panaliton aron masigurong dili molapas sa suggested retail price (SRP) kalabot sa kahadlok sa publiko tungod sa epekto sa pagsaka sa presyo sa lana ug kuryente tungod usab sa Tax Reform Law. 

Matud pa ni DTI Kalihim Ramon Lopez, wala sila’y na-monitor nga milapas sa SRP sa mga tindahan nga ilang gi-inspeksyon diin giingong 400 ka mga supermarket ang ilang gibi­sita matag semana. 

Taliwala niini, padayon gihapon ang pahinumdom sa DTI sa mga negosyante nga dili molapas sa SRP sa mga nag-unang produktong gibaligya aron dili samot nga maglisod ang mga konsumidor. 

Gitambagan usab ni Lopez ang mga mamamalit nga sa mga supermarket lamang mopalit sa ilang mga nag-uang panginahanglan tungod kay gibantayan nila kini ug mahadlok kining molapas sa SRP tungod kay mahimo man silang pahamtangan og silot sa ahensiya. 

Ang kahadlok sa pagsaka sa presyo sa mga panaliton dala pa gihapon sa pagsirit sa ‘inflation’ o ang pagsaka sa kinatibuk-ang lebel sa mga presyo sa mga epektos ug serbisyo sa nasod nga dala na usab sa implementasyon sa TRAIN Law, matud pa sa National Economic and Development Authority (NEDA). 

Base sa datos sa Philippine Statistics Authority (PSA), 4.5 porsiyento ang inflation niadtong Abril. 

Mas taas kini sa natalang 4.3% niadtong Marso ug 3.2% niadtong Abril tuig 2017. (ecb/PIA7-Bohol).