Sumbanan alang sa mga OFW-teacher, 

gipagawas sa DOLE 

TAGBILARAN CITY, Mayo 7 (PIA)--Aron mas mapadali sa gobyerno ang pagpabalik sa mga OFW nga lisensiyadong public school teachers, nagpagawas ang Department of Labor and Employment (DOLE) og mga sumbanan alang sa pagpatuman sa programang “Sa ‘Pinas, Ikaw ang Ma’am at Sir” (SPIMS). 

Gitakda sa Department Order No. 190, Series of 2018, ang proseso ug mga sumbanan alang sa pagpili sa mga benepisyaryo alang sa programa nga usa ka inisyatiba aron madani ang mga magtutudlo nga nagtrabaho sa ubang nasod nga ipadayon ang ilang propesyon dinhi sa Pilipinas. 

Nagsugod ang programa sa usa ka Memorandum of Cooperation kauban ang Department of Labor and Employment (DOLE), Department of Education (DepEd), Commission on Higher Education (CHED), Professional Regulation Commission (PRC), ug ang Philippine Normal University (PNU). 

Gumikan niini, nakahatag ang maong programa og kinatibuk-ang 1,421 ka plantilla position sa mga nipauleng OFW-Licensure Examination for Teachers (OFW-LET) passer. 

Aron mahimong benepisyaryo sa SPIMS program, ang usa ka aplikante kinahanglang usa ka Filipino citizen o may Philippine passport; OFW-LET passer nga may kasinatian sa pagtudlo og dili moubos sa usa ka tuig sulod sa milabay nga lima ka tuig; ug angay nga wala nipuyo sa nasod og tulo ka tuig. Ang mga OFW-LET passer nga nakapasa sa pasulit sulod sa milabay nga lima ka tuig, may kasinatian man sila sa pagtudlo o wala, dili na kinahanglan pang mo-agi sa usa ka online refresher course. 

Samtang ang mga OFW-LET passer nga wala pa’y kasinatian sa pagtudlo o may experience apan lima ka tuig na ang milabay, angay mo-agi sa online course nga ginahatag sa PNU o motambong sa mga regular refresher course. 

Ang mga interesadong aplikante angay nga moduso og SPIMS OFW Profile Sheet Form sa online, o dalhon kini sa NRCO Central Office sa Manila, o sa uban pang DOLE Regional Offices sa tibuok nasod, o sa mga Philippine Overseas Labor Office (POLO). 

Ang NRCO Central Office magpahigayon og preliminary evaluation ug padusoun ang aplikanteng mopasar og mga dokumento sama sa PRC ID; Certificate of Board Rating; Passport; Certificate of Employment abroad; ug Certificate of Employment isip teacher (kun duna man). 

Kun mopasar sa assessment, i-endorso sa NRCO ang profile sa aplikante sa DepEd, alang sa final screening ug evaluation, o sa PNU, kun kinahanglan og online refresher course. 

Ang mga makuhang aplikante makadawat og official letter gikan sa DepEd nga nag-ingong angay silang moduso og documentary requirements sa DepEd Division Office samtang gipaabot ang pag-aprubar sa ilang Notice of Organization Staffing and Compensation Action (NOSCA). 

Sa higayong magsugod ang benepisyaryo sa SPIMS nga magtudlo sa iyang school assignment, hatagan sila og teaching kits nga may sulod nga mga instructional material, usa ka tablet computer o mini laptop, ug uban pang school supply ug gadgets nga nagkantidad og P20,000. (ecb/PIA7-Bohol).