CAAP Bohol nangita og mga 

Airport Security Assistants 

TAGBILARAN CITY, Bohol , June 26 (PIA)—Nangita ba kamo og trabaho apan wala pa kay kasinatian, wala’y eligibility sa Civil Service ug wala makatapos sa kolehiyo? Suwayi ni ninyo. 

Ang Civil Aviation Authority of the Philippines (CAAP) nanginahanglan og mga tawo alang sa CAAP Security and Intelligence Service (CSIS) aron mamahimo’ng Airport Security Assistants alang sa ila na unya nga pagbalhin nagdto sa bag-ong tugpahanan sa Panglao. 

Trabaho sa Airport Security Assistants ang pagseguro nga luwas ug walay mahitabo’ng peligro sa mga pasilidad sa sulod sa airport, sa mga eroplano, mga pasahero ug mga tiggamit sa tugpahanan ig mga kliyente sa CAAP subay usab sa mga mandu sa National Civil Aviation Security Plan. 

Mahimong madawat kadto’ng dili pa molapas sa 40 anyos sa adlaw sa eksaminasyon, mas maayo kon wala’y kabilinggan (single), may gitas-on nga 5’2 pataas kon babaye ug 5’4 pataas kon lalaki, matud ni Captain Jim Sydiongco sa Director General sa CAAP . 

Kinahanglan usab nga ang aplikante, physically ug mentally fit, may maayong moral character ug kinahanglang dili color blind. 

Labing menos, 72 ra ka college units o duha ka tuig nga natapos sa college ra ang gikinahanglan sa aplikante ug wala nay kinahanglan pa’g experyensya ug dili na kinahanglan pag eligibility, dugang sa CAAP. 

Kadtong mga interesdao, kinahanglang makakuha sa application forms nga naa makuha gikan sa CAAP Tagbilaran, CAAP Mactan ug CAAP Pasay o ma-download sa www.caap.gov.ph.

Pagduso sa gi-fill-up nga application, kinahanglan kining patabanan sa authenticated copy sa diploma o transcript of records, xerox sa PHA copy sa Birth certificates, Police Clearance, NBI Clearance ug labing bag-ong 2 x 2 nga hulagway nga colored diha sa puti nga background. 

Pahinumdom usab sa CAAP, kadto lamang applications ug mga papeles nga giduso pinaagi sa personal o koryo ngadto sa sa CAAP didto sa Mactan, o Tagbilaran sa wala pay alas 5:00 sa hapon sa Hulyo 13 ang ilakip sa pagpili. 

May panel interview ug physical ug mental nga eksaminasyon ang himoon ilabi na sa ka sensitibo sa lugar nga trabaho-an. 

Kadtong mga mopasar sa interview ug examinations, ipailawom sa libre nga bansaybansay apan matud sa CAAP nga ang trainee nay maningkamot sa ilang pagkaon, besti, accommodation ug allowance samtang gipailawom sa training. 

Alang sa mga applications dinhi sa Bohol, iduso kini ngadto kang: Violeto Sarmiento, Administrative Assistant og Acting Personnel Officer, Civil Aviation Authority of the Philippines, Tagbilaran City, Tel No. 411-3320 ug 412-0833. (rahc/PIA-7/Bohol)

Apil sa mga trabaho sa Airport Security Assistants nga gikinahanglan sa CAAP mao ang pagseguro nga luwas sa kakuyaw ug hulga ang mga pasilidad sa airport sama ning mga gambalay, mga eroplano unya pohon, mga pasahero u gang kinatibuk-ang compound aron dili masudlan sa mga may dautang tumong. (PIA7/Bohol/foto by Ric Obedencio)