Performance sa mga opisyal sa LGUs,

ipa-audit ni Duterte sa DILG

TAGBILARAN CITY, June 27 (PIA)--Gimanduan ni Presidente Rodrigo Duterte si Department of Interior and Local Government (DILG) officer-in-charge Eduardo Año sa pagpahigayon og audit sa performance sa mga gobernador, mayor ug uban pang opisyal sa mga lokal nga kagamhanan.

Sa mensahe ni Duterte atubangan sa mga bag-ong napiling mga kapitan sa barangay sa Rehiyon IX sa Municipal Gymnasium sa Molave, Zamboanga del Sur, gipasabot niini nga nga tuyo niining mahibaw-an kun kinsang mga lokal nga opisyal ang nagtrabaho.

Matud pa sa Presidente nga kun taas ang lebel sa kriminalidad ug nagbalik-balik lamang ang operasyon sa ilegal nga droga sa usa  ka lugar, pasakaan niya kini og kasong ‘neglect of duty’.

Gitumbok sa Presidente nga kun i-rekomendar ni Año sa iyang imbestigasyon nga tangtangon sa serbisyo ang usa  ka lokal nga opisyal, himuon niya kini.

Giingong pagmatuod kini nga walay katakos ang usa  ka lokal nga opisyal sa kagamhanan sa iyang lugar nga nasakopan.

Gitumbok usab sa Presidente nga kinahanglan niya ang tabang gikan sa mga lokal nga opisyal tungod kay dili niya makayang mag-inusara nga padaganon ang Republika sa Pilipinas. (ecb/PIA7-Bohol)