‘3 Pointer ng Bayan’ batok sa korapsyon, droga ug
krimen nga gipahigayon sa Garcia Hernandez, nagmalampuson
TAGBILARAN
CITY, June 27 (PIA)--Nagmalampuson ang gipahigayong “3-Pointer
Ng Bayan” didto sa Garcia Hernandez Gymnasium niadtong pista sa gabii sa maong
lungsod agi og pagsaulog sa kapistahan ni San Juan Bautista.
Kining adbokasiya sa
administrasyon ni Presidente Rodrigo Duterte gitumong aron batokan ang korapsyon,
droga ug krimen.
Si Presidential
Communications Operations Office (PCOO) Kalihim Martin Andanar nga mao usab ang
convenor sa Ready! Set! Go! nitambong sa maong kalihokan aron ipakatap ang
kamahinungdanon sa sports o paugnat sa kusog ilabi na sa mga kabataan.
“Ipagpatuloy
po natin ang pagsuporta sa kampanya ni Presidente para tuluyang masugpo ang
iligal na droga, kriminalidad at katiwalian na nakasisira sa ating bansa.
Particularly sa kabataan, mag-focus na lang sa pag-aaral at sa sports imbes na
magpakalulong sa droga,”
awhag ni Andanar sa gibana-banang 2,000 ka nitatan-aw sa Garcia
Hernandez gymnasium niadtong Domingo sa gabii.
Ang maong adbokasiya sa three-point
shootout gisalmotan sa mga labing maayo nga tigduwa og basketball sa mga
napiling barangay sa maong lungsod diin si Lawrence John Llemit gikan sa
barangay Malinao ang nahimong kampiyon nga nipildi sa 10 ka nisalmot.
Silang
Michael Arjay Naldoza nga taga Tabuan ug Russel Ranario sa East Canayaan ang
nakakuha sa ikaduha ug ikatulong pwesto sa maong duwa.
Kuyog
ni Andanar nga nitambong sa maong okasyon silang Kongresista Arthur Yap sa Bohol
3rd District, Agusan del Sur 1st District Congresswoman Ma. Valentina Galido
Plaza, Garcia Hernandez Mayor Tita Baja Gallentes, Vice Mayor Lito Dajalos, Tagbilaran
City Mayor John Geesnell Yap II ug Dauis Mayor Marietta Sumaylo.
Si Mayor
Gallentes sa iyang bahin nipadayag og suporta sa adbokasiyang 3-Pointer ng
Bayan diin iyang gibutyag nga tigpahigayon usab sila og summer trainings sa
mga kabataan sa ilang lungsod aron maka-prodyus og maayong atleta nga manghawod
sa ilang napiling sports.
“Like this initiative by the national
government, we want to hone committed youth leaders as we declare our town drug
free (sama niining inisyatiba sa nasudnong kagamhanan, gusto usab kami mobansay
og masaligang lider sa kabataan diin among gi-deklarar ang among lungsod nga
gawasnon sa droga.”
Ang 3-Pointer
ng Bayan nagpadayon sa paglibot sa tibuok nasud ug kasagarang gipangunahan ni Special
Assistant to the President Christopher Lawrence "Bong" Go, nga maoy
nagmugna niining adbokasiya. (ecb/PIA7-Bohol)
Ang “3-Pointer ng Bayan,” usa ka adbokasiya aron batokan ang korapsyon, droga ug krimen mibisita sa Garcia Hernandez, Bohol niadtong Hunyo 24 sa gabii, agi og pagsaulog sa kapistahan sa maong lungsod. Gitambongan kini mismo ni PCOO Kalihim Martin Andanar kauban nilang Bohol 3rd District Cong. Arthur Yap, Agusan del Sur 1st District Congresswoman Ma. Valentina Galido Plaza, Garcia Hernandez Mayor Tita Baja Gallentes, Vice Mayor Lito Dajalos, Tagbilaran City Mayor John Geesnell ‘Baba’ Yap II ug Dauis Mayor Marietta Sumaylo. (PIA-Bohol)
No comments:
Post a Comment