Voter’s registration alang sa piniliay 

sa Mayo 2019, ipadayon karong Hulyo 

TAGBILARAN CITY, June 28 (PIA)--Buksan og balik sa Commission on Elections (Comelec) sa Hulyo 2, 2018 ang pagpa-rehistro sa mga botante o continuing registration of voters isip pagpangandam sa umaabot nga mid-term elections sa Mayo 13, 2019. 

Ang continuing registration sa mga botante molanat hangtod sa Setyembre 29, 2018. 

Ang aplikasyon kinahanglang personal nga iduso sa mga buhatan sa election officer sa ilang mga lugar gikan sa alas-8 sa buntag hangtod sa alas-5 sa hapon gikan sa adlaw’ng Lunes hangtod Sabado apil ang mga holidays. 

Magbutang usab ang Comelec og mga satellite registration sa nahisgotang panahon diin moadto ang mga field officials sa mga baranggay, public plaza, mga eskwelahan ug uban pang pampublikong lugar aron modawat sa mga magpa-rehistro. 

Himuong prayoridad sa maong satellite registration ang pagproseso sa aplikasyon sa mga buntis, tigulang ug indigenous people. 

Samtang gitakda usab sa Hulyo 15, 2018 ang pagpa-rehistro sa mga political party ug kuwalisyon sa mga political party samtang ang pagduso sa petition for registration of coalition of political parties gitakda hangtod sa Agosto 31, 2018. (ecb/PIA7-Bohol)