Taga Batuan ming daug isip 

Huwarang Pantawid Pamilya 

TAGBILARAN CITY, June 14—Usa ka pamilya nga benepisaryo sa Pantawid Pamilyang Pilipino Program sa Batuan ang migawas nga mananaug sa Provincial level sa bangga sa Huwarang Pantawid Pamilya Program na gipasiugdahan sa Department of Social Welfare and Development (DSWD). 

Tulo ka banay nga benepisaryo sa 4Ps ang nakadaug sa ilang mga municipal levels, kinsa mao na usab ang makaapil sa Provincial Screening sa Huwarang Pantawid Pamilya. 

Ang tulo ka banay gikan sa tulo ka munisipyo sa probinsya: Trinidad, Batuan og Balilihan. 

Ang pamilya nga Oque nga taga Batuan ang midaug karong tuiga sa maong programa sa DSWD. 

Ang swerte nga banay maoy representante sa Bohol ug isalmot na usab sa bangga sa ubang pamilya nga nidaog sa ilang Probinsya. 

Kon ang ilang swerte magpadayon ug modaug ug manguna sa 5 pa ka banay nga mga nidaug sa mga lalawigan sa rehiyon, mamahimo silang grand winner sa Regional Award sa Huwarang Pantawid Pamilya Program. 

Sa laing bahin, ang Pamilya Lingacion sa Balilihan maoy naa sa ika duhang lugar ug ikatulo usab ang Pamilya Muring sa Trinidad. 

Ang Huwarang Pamiyang Pilipino gihimo aron makita sa matag banay nga Pilipino nga ang pamilya nga nagtinabangay ug suportahay susi sa paglambo sa nasod. 

Dugang pa, kining programa nagtutok aron matabangan nga mapa-eskwela ang mga kabataan ug mapahimsog ang lawas sa sakop sa pamilya. 

Ang mga pamilya nga na-apil sa maong programa nagpakita sa ilang pag asenso bisan sa ilang kahimtang sa pag panarbaho, pagpaskwela sa mga anak, ug pagpakaon sa ilang pamilya. 

Ang mga mingdaog niini, gi-isip nga sumbanan nga pamilya sa tibuok Pilipinas. 

Nag sugod niadtong tuig 2012, ang Huwarang Pamilyang Pilipino gihari-an og Bol-anon dihang niadtong 2016, nahimong Grand Winner ang Pamilya Garay nga taga Jagna. 

Didto sa sa awarding ang mga kadagko-an sa Bohol sama nila ni Mrs. Liza Quirog, Kagawad Jun Pabe, Batuan Mayor Antonino Jumawid, Board Member Alexie Tutor, ug ang host sa kalihokan nga ang DSWD- Region 7. (rtctIntern/PIA7-Bohol)

Gitunol ni Liza Quirog, sa ngalan ni Gob Edgar Chatto ang plake ug dyutay nga cash ngadto sa amahan sa banay nga Oque, kinsa ming gawas nga mananaug sa 2018 Huwarang Pantawid Pamilyang Pilipino Provincial Winner. (rtctIntern/PIA7-Bohol)