DOLE, nipasidaan nga dili angay himuong babag 

ang edad sa aplikante sa pag-apply og trabaho 

TAGBILARAN CITY, June 18 (PIA)--Gipahinumdoman sa Department of Labor and Employment (DOLE) ang mga employer nga dili nila angay himuong basehan ang edad sa usa ka aplikante sa pagdawat sa gi-aplayang trabaho. 

Nipasidaan si DOLE- Policy and Program Development Division chief, Nicanor Bon nga ilegal kini ug may tukmang silot base sa Republic Act 10911 o Anti-Age Discrimination in Employment Act. 

Matud pa ni Bon, ang angay himuong basehan sa mga employer sa pagkuha og trabahante mao ang abilidad, katakos, kahibalo ug kwalipikasyon sa usa ka aplikante alang sa trabahong gi-aplayan niini. 

Giingong agi og pagsunod sa RA 10911, ang mga employer nga molapas sa anti-age discrimination act mahimong pahamtangan og multang naa sa P50,000 taman P500,000 o pagka-bilanggo og tulo ka buwan hangtod duha ka tuig, base sa desisyon sa hukmanan. 

Gesiguro sa DOLE nga andam silang mohatag og tabang sa mga aplikanteng nakasinati og age discrimination, sama sa pagtudlo kun unsaon pagpasaka og reklamo sa piskal. 

Apan gitin-aw usab sa DOLE nga may mga eksepsiyon nga gitakda ang balaod kalabot niiini, sama na lamang sa mga trabahong dili na mahimong makaya sa mga taas na og edad sama sa hinete, minero ug uban pang mga bug-at nga trabaho. (ecb/PIA7-Bohol)