7th Nat’l Rice Technology Forum,

gilusad sa Talibon

TAGBILARAN CITY, July 19 (PIA)--Gilusad gahapon, Hulyo 18 ang ika-7 nga National Rice Technology Forum sa lungsod sa Talibon.

Gipangunahan kini mismo ni Department of Agriculture (DA) Kalihim Emmanuel ‘Manny’ Piñol kauban nilang DA-7 RD Atty. Salva Diputado, Gob. Edgar Chatto, Bise Gob. Dionisio Balite ug Talibon Mayor Restituto Auxtero.

Gitambongan ang maong forum sa mga mag-uuma, municipal agriculturists ug mga rice technicians.  

Ang maong forum may pag-ambitay og kahibalo gikan sa mga eksperto gikan sa mga buhatan sa National Irrigation Administration (NIA), Philippine Crop Insurance Corporation (PCIC) ug Agricultural Training Institute (ATI).

Highlight sa forum ang teknolohiya sa pagpanguma nga nagtugot sa mga mag-uuma  sa pag-adto mismo sa umahan aron mag-ebalwar, mag-assess, ug magpahiayon sa kasamtangang teknolohiya atol sa panahon sa ting-uma nga tinguhang patas-an ang produksiyon ug kubsan ang kantidad.

Ang lalawigan sa Bohol maoy ika-7 nga hugna ug ang kinadak-ang coverage nga naglangkob sa 23 ka ektarya alang sa 12 ka kompanyang nisulod.

Pila ka serye nga aktibidad sa kalihokan sa tibuok gidugayon sa proseso sa pag-uma ang masaksihan sa mga mag-uuma paingon sa kulminasyon ug plenary session nga gitakda sa Setyembre 19 taman 21 ning tuig. (ecb/PIA7-Bohol)

 

Gipangunahan mismo ni DA Kalihim Manny Piñol ang paglusad sa ika-7 nga National Rice Technology Forum didto sa lungsod sa Talibon niadtong Miyerkoles, Hulyo 18. (hulagway sa DA)