Bangga sa kuradang, 

karong Sabado na 

TAGBILARAN CITY, July 26 (PIA)--Ang bangga sa sayaw nga kuradang gitakda karong Sabado sa alas 3 sa hapon. 

Ang kuradang nga usa ka tradisyonal nga Bol-anong sayaw, maoy highlight sa Sandugo Street Dancing Competition 2018. 

Ang street dancing karong tuig nga gitawag og “Legacy@30,” usa ka espesyal nga edisyon tungod sa ika-30 ka tuig na sa Sandugo Festival. 

Si Carmen Gatal sa street dancing committee mibutyag nga may 12 ka mga grupo ang mosalmot sa bangga sa sayaw nga may P300,000 nga grand prize, P250,000 premyo alang sa ikaduhang dapit ug P200,000 premyo alang sa ikatulong mananaog. 

Ang mga mosalmot mao ang mga lungsod sa Balilihan, Baclayon, Bilar, Catigbian, Dauis, Napo Loon, Loboc, Garcia Hernandez, Jagna, Sikatuna, Tubigon ug Sierra Bullones. 

Ang mga partisepante mosayaw paingon sa CPG Sports Complex gikan sa Plaza Rizal sugod sa alas 3 sa hapon ug ipahigayon ang ilang showdown sa kuradang sa CPG Sports Complex. 

Giingong gidapit si Senador Loren Legarda isip pinasidunggang dinapit sa street dancing ning tuiga. 

Sa mga milabay nga katuigan, ang Sandugo Festival kasagarang tak-opan pinaagi sa kompetisyon sa street dancing. (ecb/PIA7-Bohol) 

Ang Barangay Napo sa lungsod sa Loon maoy unang nakakuha sa grand prize sa Bangga sa Kuradang ug Subli sa Sandugo sa niaging tuig. (file photo)