Duterte, nipasidaan sa mga ahensya sa gobyerno 

nga may pinakadaghang red-tape related report 

TAGBILARAN CITY, July 25 (PIA)--Wala ni palyar si Presidente Rodrigo Duterte sa iyang ikatulong State of the Nation Address (SONA) sa paghishot sa iyang nagpadayong kampanya batok korapsyon ilabi na sa mga ahensya sa gobyerno nga may pinakadaghang reklamo og red tape gikan sa publiko. 

Nihatag na usab og bag-ong pasidaan si Duterte batok sa mga ahensya sa gobyerno nga dili mosunod sa polisiya sa gobyerno nga himuong mas dali ug sayon ang pag-negosyo sa nasod. 

Giingong partikular nga gitumbok sa presidente ang mga naa sa ubos sa executive branch. 

“Makinig sana kayo – and government agencies to faithfully implement this law and simply simplify the process. Hinihingi ko ho ‘yan sa lahat nasa gobyerno under my control and supervision. Huwag ho kayong magkamali,” makusganong pahayag ni Duterte. 

Gimanduan ni Duterte ang tanang local government units nga hingpit nga sundon ang balaod sa ‘ease of doing business’ ug himuong sayon ang proseso sa pagnegosyo. 

Gipasidan-an sila sa presidente nga himuong customer-friendly ang ilang serbisyo sa katawhan. 

Samtang nihatag usab si Duterte og mensahe sa iyang mga tig-suporta ug amigo nga gibutang sa pwesto sa gobyerno. 

Matud pa sa president nga bisan dako ang iyang pagsalig kanila, dili siya magduha-duha sa pagtangtang sa bisan kinsa nga naa sa posisyon kun mapamatud-ang nalambigit sa korapsyon. (ecb/PIA7-Bohol)