DOE milagda sa mga giya 

pagpili sa tinubdan sa RE 

TAGBILARAN CITY, Bohol July 28 (PIA)—Gilagdaan na sa Department of Energy (DOE) pinaagi ni Secretary Alfonso G. Cusi ang usa ka Department Circular (DC) nga naglatid sa mga giya kon unsaon sa usa ka konsumidor nga makakuha og tinubdan sa ilang koryente pinaagi sa renewable energy. 

Ang Department Circular nga giulohan og “Promulgating the Rules and Guidelines Governing the Establishment of the Green Energy Option Program Pursuant to the Renewable Energy Act of 2008,” gilagdaan ni Kalihim Cusi niadtong July 18, 2018. 

Usa ka circular nga naluwatan subay sa Section 9, Chapter III sa Renewable Energy (RE) Law, kini nagmandu sa DOE sa pagpabarug sa Green Energy Option Program (GEOP). 

Pinaagi sa GEOP, ang mga konsumidor may giya na sa pagpili sa hain may ilang gusto nga tinubdan sa RE, basi sa ilang panginahanglan. 

Nalatid sa GEOP ang mga batakang sumbanan ug pamaagi nga maggiya sa mga trasaksyon tali sa mga konsumidor, RE suppliers ug sa transmission network service providers, ilabi na sa mga hisgutanan sa pagpili ug paggamit sa RE resources sa labing barato nga presyo ug sa malungtaron nga paagi. 

Ang GEOP, usa ka programa nga boluntaryo nga apilan sa mga konsumidor nga may binuwan nga average peak demand sa 100kW ug labaw pa, sa miagi nga 12 ka buwan. 

Gani, kadtong may menos pa sa 100Kw nga average peak demand mahimo na gani nga makaapil sa GEOP, hinuon, kini kon katugotan sa DOE, human sa mga konsultasyon sa National Renewable Energy Board ug nga apil sa industriya, human usab masuta nga ang mga technical requirements ug standards na-pakita sa konsumidor. 

Human sa paglagda sa mga balaod sa GEOP, milaum ang DOE nga maka-enganyo pa sa ubang konsumidor nga motan-aw sa posibilidad RE isip lain nga tinubdan. 

Misalig ang DOE nga ang GEOP magduso sa paggahum sa mga Pinoy pinaagi sa paghatag kanila og mas lapad nga kapili-an sa ilang panginahanglan sa koryente. 

Ang programa usab nahasubay sa stratehiya sa DOE nga hingusgan ang pagduso sa kalambu-an, pag-gamit ug pagnegosyo sa indigenous ug limpyo nga tinubdan sa enerhiya, samtang nagseguro sa mas malungtarun ug kasaligan nga supply sa koryente sa nasud. (rahc/PIA-7/Bohol) 

Mahimo na nga makakuha ang mga konsumidor sa tinubdan sa koryente gikan sa mga nagkadaiyang renewable energy source human may giya na nga nalagdaan subay niini. (PIABOhol)