Lumad Napoanon, kampeon sa ikatulong 

higayon sa Bangga sa Kuradang 

TAGBILARAN CITY, July 30 (PIA)--Gi-deklarar nga grand champion ang Lumad Napoanon sa Barangay Napo, lungsod sa Loon ug nakuha ang ‘grandslam’ sa ikatulong higayon nga pag-apil sa grupo sukad niadtong tuig 2016 sa Bangga sa Kuradang sa bag-o lang gipahigayong Sandugo Street Dancing Competition 2018. 

Gawas sa grand prize nga P300,000, nakuha usab nila ang P30,000 nga premyo isip Best in Street Dancing ug laing P10,000 isip Best in Production Design and Costume. 

Sa ikatulong sunod-sunod nga tuig, (2016, 2017, ug 2018), nakuha usab nila Jose Zuasola Lugo ug Juliet Rebucas Murcia sa lungsod usab sa Loon ang titolong ‘Kuradang King and Queen’ ug nakadawat sa ganting P5,000. 

Ang lungsod sa Tubigon ang gi-deklarar nga 1st runner-up ug nakadawat sa ganting P250,000. 

Samtang ang lungsod sa Dauis ang nahimutang sa ikaduhang dapit og nakadawat sa 

ganting salapi nga P200,000 ug laing P10,000 isip Best in Music. 

Ang ubang nisalmot sa bangga sa kuradang naglakip sa mga lungsod sa Balilihan, Baclayon, Bilar, Catigbian, Loboc, Garcia-Hernandez, Jagna, Sikatuna ug Sierra Bullones. 

Ang mga hurado naglakip nila sa Executive Director sa The Negros Museum nga si Tanya Lopez, visual artist ug designer nga si Leeroy New, Consultant sa National Commission for Culture and the Arts nga si Arvin Manuel Villalon, Deputy Executive Director sa NCCA nga si Marichu Tejano, ug ang chairman sa Board of Judges nga si Dr. Shirley Halili Cruz, Founder ug Director sa Halili Cruz school of ballet. 

Si Senadora Loren Legarda ang nag-unang pinasidunggang dinapit diin sa iyang mensahe, gidayeg niini ang kalig-on ug pagbangon sa Bohol gikan sa mga trahedyang miigo sa probinsiya sama sa 7.2 magnitude nga linog niadtong tuig 2013. (ecb/PIA7-Bohol) 

Ang Lumad Napoanon gikan sa Barangay Napo, lungsod sa Loon ang nahimong grand champion ug nakuha ang ‘grandslam’ sa ikatulong higayon nga pag-apil sa Bangga sa Kuradang Sandugo Street Dancing 2018 niadtong Sabado. Gawas sa grand prize, nakuha usab sa grupo ang Best in Street Dancing, Best in Production Design and Costume ug ang ‘Kuradang King and Queen.’ (PIA-Bohol)