Ground breaking sa BSP-Bohol, 

gipangunahan ni Gov. Espenilla 

TAGBILARAN CITY, July 30 (PIA)--Gipangunahan mismo ni Bangko Sental ng Pilipinas Governor Nestor Espenilla ang groundbreaking sa BSP Bohol branch sa barangay Tinago, lungsod sa Dauis karong buntag, Hulyo 30. 

Ang pagatukoron nga P170 milyong BSP Bohol branch gitakdang matapos sulod sa duha ka tuig. 

Kauban ni Espenilla sa groundbreaking silang BSP Assistant Governor Dahlia Luna, National Economic and Development Authority (NEDA) Kalihim Ernesto Pernia, Bohol Bankers Association President Elena Deligero, Gob. Edgar Chatto, Dauis Mayor Miriam Sumaylo ug Provincial Administrator Ae Damalerio. 

Si Espenilla mibutyag nga dili lisod ang ilang desisyon nga magbutang og ilang buhatan dinhi tungod kay malambuon man nga lalawigan ang Bohol. 

Gani, matud pa niini nga base sa opisyal nga datos, ang lokal nga ekonomiya sa lalawigan sa Bohol makanunayon nga nagtubo sa average nga 9.1% sa milabay nga duha ka tuig ug mas paspas pa sa national average. 

Matud pa ni Espenilla nga nagpadayag lamang kini sa hayag nga kaugmaon sa Bohol nga mapamatud-an sa sustenadong pagsulod sa mga puhunan, sustenidong pinansiyal, ug mga nagpadayong kalihokan sa turismo. 

Ang BSP Governor mi-presentar sa BSP collector’s item ngadto kang Chatto, Sumaylo ug Pernia human sa groundbreaking rites. 

Tinguha sa BSP nga suplayan ang Bohol og ‘world class’ nga mga salaping papel ug sensilyo aron ma-benepisyohan ang estado sa lalawigan isip ‘international destination.’ 

Ang katukoran sa BSP Bohol branch gipaabot nga dako og matabang sa ekonomiya sa lungsod sa Dauis ug sa lalawigan ilabi na nga nahimutang kini duol sa New Bohol Panglao International Airport. (ecb/PIA7-Bohol) 

Gi-presentar ni Bangko Sental ng Pilipinas Governor Nestor Espenilla ang BSP P500 bills collector’s item ngadto sa Bol-anong NEDA Kalihim Ernesto Pernia human sa gipahigayong groundbreaking rites sa BSP Bohol branch sa barangay Tinago, lungsod sa Dauis, lalawigan sa Bohol niadtong Hulyo 30. (ecb/PIA7-Bohol)