Final draft sa bag-ong konstitusyon, 

gi-aprobahan na sa Con-Com 

TAGBILARAN CITY, July 3 (PIA)--Gi-aprobahan na karong adlawa sa Consultative Committee ang final draft sa bag-ong konstitusyon. 

Ubos sa balaodnon, matunga sa napulog-walo ka rehiyon ang nasud diin may tig-duha ka senador, usa ka regional governor ug deputy regional governor. 

Matag legislative district usab may nagkadaiyang representante ug madugangan og usa ka gatos ug kanum-an ka representante sa mga political party mao nga mokabat na sa kuwatrosentos ang gidaghanon sa mga kongresista. 

Si Con-Com Spokesman Ding Generoso nagkanayon nga pilion ang mga regional ug deputy regional governor sa mga miyembro sa regional legislative assembly nga ibotar sa katawhan. 

Giingong tanang napiling opisyal mo-alagad og upat ka tuig ug hangtod duha ka tuig nga termino lamang. 

Nakalatid usab sa draft constitution nga mabalhin sa mga rehiyon ang gahom sa pagkolekta sa ilang buhis ug kap-atan hangtod kalim-ang bilyong piso ang gipaabot nga direktang maadto sa mga rehiyon. 

Gilaoman nga maduso na kang Presidente Rodrigo Duterte sa Hulyo 9 ang maong draft, duha ka semana sa dili pa ang ikatulong State of the Nation Address (SONA) sa Hulyo 23. 

Kahinumdoman nga gimugna ni Duterte ang Con-Com aron tun-an ang mga probisyon sa batakang balaod nga kinahanglang amyendahan. (ecb/PIA7-Bohol)