Katapusang semana sa Mayo, gi-deklarar 

nga ‘National Data Privacy Awareness Week’

TAGBILARAN CITY, July 6 (PIA)--Gilagdaan na ni Presidente Rodrigo Duterte ang usa  ka proklamasyon nga nagdeklarar sa katapusang semana sa Mayo isip ‘National Data Privacy Awareness Week.’

Tuyo sa gilagdaang Presidential Proclamation No. 527 nga mas hingosgan pa ang paghatag og kamahinungdanon sa data privacy ug data protection aron mapalig-on pa ang mga programang ginahimo sa National Privacy Commission (NPC).

Gilagdaan kini mismo sa Presidente sa adlaw na dili ma-access o mabuksan ang kapin 100 ka websites sa nagkalain-laing buhatan sa gobyerno tungod system failure.

Nakalatid sa maong proklamasyon nga gi-ila sa estado ang kamahinungdanon sa information and communications technology sa pag-establisar sa nasod ug segurohon niining mapanalipdan ang ‘right to privacy’ sa matag indibidwal.

“The State recognizes the vital role of information and communications technology in nation-building and its inherent obligation to ensure that personal information in information and communications systems in the government and in the private sector are secure and protected,” sigun pa sa proklamasyon.

Base sa kamanduan, pangunahan sa NPC ang pagsaulog sa tanang buhatan ug ahensya sa gobyerno alang sa ‘National Data Privacy Awareness Week.’

Gidasig usab ang mga local government units ug ang pribadong sektor sa pagsalmot sa mga kalihokan matag tuig. (ecb/PIA7-Bohol)