Tulay sa Anislag, Maribojoc 

gisusi ni Villar 

MARIBOJOC, July 5 (PIA)--Gisusi ni Department of Public Works and Highways (DPWH) Kalihim Mark Villar ang nagpadayong konstraksyon sa tulay sa Anislag, ning lungsod. 

Si Villar gi-ubanan nilang Gob. Edgar Chatto, Cong. Rene Relampagos, Cong. Art Yap, Regional Director Ador Canlas, Usec. Robert Bernardo ug Project Engineer Bernardo Austria. 

Gi-awhag ni Villar ang mga Bol-anon nga kun may mga espisipikong reklamo kalabot sa ilang mga proyekto dinhi, iduso lamang kini kang DPWH-7 RD Canlas aron ilang matino ug mapasabot ang teknikal nga mga rason kabahin niini. 

“Ako na mismo ang kakausap sa mga contractor o planners,” pasalig ni Villar kun may mga kuwestyonable nga mga proyekto dinhi. 

Sa gipahigayong briefing, gitaho sa DPWH nga ang target completion sa tulay sa Anislag karong umaabot Oktubre 7 na ning tuig. Samtang ang tulay sa Hinawanan, lungsod sa Loay gitakdang mahuman karong Agosto 21 ug sa Agosto 14 usab matapos ang tulay sa Palo. 

Ang mga tulay sa Damiao, Hunan ug Bateria gitakdang matapos karong umaabot Agosto t 8, 2018. 

Giingong gi-mobilisar na usab ang mga ekipo sa mga kontaktors alang sa tulay sa Clarin, lungsod sa Loay diin ang civil works niini sugdan na sa dili madugay ug gitakda kining matapos sa Oktubre 17, 2019. 

Gipahibalo ni Canlas nga gibalik na karon ang pagtrabaho sa tulay sa Makapiko nga nagdugtong sa mga lungsod sa Balilihan ug Batuan human sa re-bidding ug gitakda kining matapos sa ikaduhang semana sa Oktubre ning tuig. 

Gipasabot usab niini nga may 12 ka nagpadayong road reconstruction/reblocking nga proyekto sa lalawigan diin parte kini sa mga nangagubang dalan tungod sa linog niadtong Oktubre 2013 ug karon lamang kini gi-trabaho tungod kay ang pondo alang niini karon lamang tuig gipagawas. 

Ang pagbisita ni Villar dinhi karong adlawa nunot sa mando ni Presidente Rodrigo Duterte atol sa iyang pagbisita niadtong Hunyo 28 didto sa Bellevue Resort sa Panglao diin gipasalig niini nga iyang manduan si Villar sa pag-anhi aron susihon ang mga nagpadayong proyekto sa DPWH sa lalawigan. (ecb/PIA7-Bohol) 

Si DPWH Kalihim Mark Villar (wala) nisusi sa nagpadayong gi-trabahong tulay sa Anislag, lungsod sa Maribojoc kauban ni DPWH-7 RD Ador Canlas Huwebes sa pales. (ecb/PIA7-Bohol) 

Si DPWH Kalihim Mark Villar (tunga) kauban nilang Gob. Edgar Chatto, DPWH-7 RD Ador Canlas Cong. Rene Relampagos ug Cong. Art Yap atol sa ilang pag-inspeksyon sa tulay sa Anislag, lungsod sa Maribojoc, Huwebes sa pales. (ecb/PIA7-Bohol)