Libre’ng pagparehistro sa

Trademark, giuswag- DTI

TAGBILARAN CITY, Bohol, July 19 (PIA)—Naglaraw ka  ba nga iparehistro ang trademark sa imong negosyo, apan nagduha-duha paghimo niini tungod sa posible nga mga bayranan?

Kon ang imong trademark nga gipangandoy nasubay sa priority sectors nga gitumbok sa Department of Trade and Industry (DTI) sama sa agri-business: food ug resource-based processing, aerospace parts, automotive ug auto spare parts, chemicals, electronic manufacturing ug semi-conductor, serbisyo sa  manufacturing, construction, design-oriented furniture ug garments, shipbuilding (RORO, small or medium-sized vessels), Information Technology, Business Process Management, mga kagamitan ug mga hulmahan sa industriyal nga gamit, tourism ug transport ug logistics, swerte ka.

Kini tungod kay ang Department of Trade and Industry (DTI) ug  ang Intellectual Property of the Philippines (IPOPHL) mipa-uswag pa sa ilang programa nga “Juana Make a Mark.”

                                                                                                         

Sa napa-extend nga programa, ila na nga tangtangon ang balayranan sa trademark application sa 1,000 ka Micro, Small, and Medium Enterprises (MSMEs).

Kini matud pa sa IPOPHL, magpadaginot sa mga aplikante nga MSME og mga Php 3,000 gikan sa gitangtang nga balayranan sa basic filing, color claims, ug first publication fees.

Ang “Juana Make a Mark” o ang Trademark Registration Incentive Package, kabahin sa stratehiya pagtabang sa mga MSMEs aron makaapil na sila sa local supply chain hangtud nga makaapil na usab sila sa global market,” matud pa ni Trade secretary Ramon Lopez.

Dili pa lamang dugay nga didto sa MSME Summit sa Clark, Pampanga, Hulyo 10, ang DTI ug  ang IPOPHL milagda sa extension sa ilang nahaunang kasabutan nga gilatid sa Memorandum of Agreement (MOA) nga magtapos na sa Juana Make a Mark sa Pebrero 14.

Niining bag-o lamang, ang Juana Make a Mark, taman na sa Pebrero 14, 2019, o hangtud ang tanan nga applications mapahipno na.

Nalipay ang IPOPHL tungod sa kalampusan nga nasinati sa unag hugna sa programa nga nagpakita na nga ang mga MSME nakakita na sa  ka mahinungdanon sa trademarks aron makahatag kanila og bentaha kon magmarket sa ilang mga produkto.

Hinuon, aron maka-apil sa programa, ang MSME nga interesado, kinahanglan nga naa maglihok sa mga prayoridad nga sector sa DTI nag nalista sa unahan.

Gawas niana, matud sa IPOPHL nga kinahanglan usab nga ang negosyo, may kaugalingon na nga business name, napahimutang sa mga lugar nga may hulga sa katalagman, o nag-sagubang sa social ug economikanhong hagit.

Maka-apply usab sa Juana Make a Mark kon aduna nay labing menos duha  ka trademarks nga wala pa marehistro, dili molapas sa 5 ang empleyado ug nakanegosyo na sa usa  ka tuig ug kon may ikapakita nga limitadong kapasidad sa pagbayad sa applications.

Aron maka-apil, ang mga MSME kinahanglang mo-fill up sa Trademark Registration Incentive Package alang sa Waiver sa balayranan ug Trademark Application Forms, i-submiter kining forma  lakip ang gikinahanglang attachments sa hain mang buhatan sa DTI, magkuha og DTI endorsement sa application ngadto sa IPOPHL ug pagduso niining application nagdto sa Intellectual Property Satellite Officer. (rahc/PIA-7/Bohol)