‘OTOP Hub’ gibuksan diha sa 

Home & Fashion sa ICM- DTI 

TAGBILARAN CITY, Bohol, July 1 (PIA)—Gibuksan niadtong Hunyo 22, 2018 ang labing bag-o nga padulnganan sa mga buot mosaksi og mopalit sa mga produkto sa kalungsuran sa Bohol nga gisuportahan sa Department of Trade and Industry (DTI). 

Ilhon na karon nga One Town One Product (OTOP) Hub, kining bag-ong lugar nga gibuksam, anaa sa Home and fashion department sa Island City Mall, dinhi sa Tagbilaran. 

Kahinumduman nga ang DTI mitabang sa mga kalungsuran nga makahimo sa pakadak-an nga produkto, subay usab sa mga materyales nga sayon rang kuhaon sa ilang mga kasilinganan. 

Human mahukmi sa lungsod kon unsa ang ilang himoon nga produkto, laing tabang sa DTI ang paghimo sa produkto nga mas nindot pinaagi sa mga bansay ug sa pag-enhance pa sa desinyo niini nga mas dali nga magamit, ug mas pillion pa kini sa kadaghanan. 

May tabang usab ang DTI alang sa pagbaligya sa produkto, sa pagbansay sa mga tawo aron makamao na nga mohipos sa halin ug pagpakig-ambas sa uban nga produkto, segun pa sa DTI. 

Aron mas dali nga pangitaon ang mga produkto gikan sa OTOP, ang paghimo og us aka OTOP hub nga hagbonganan sa mga produkto gikan sa kalungsuran maoy gihatagan og prayoridad sa mga tinugyanan, niining bag-o lamang. 

Subay niini, ang Alturas Supermarket Corporation, ang nag-una nga kompanya sa pag-ugmad sa mabulokon nga ekonomiya sa lalawigan, mitanyag sa ilang dako nga mall alang sa pagbutang og luna alang sa OTOP. 

Usa ka Memorandum of Agreement ang gilagdaan nila ni Eugenia D. Madrio, Group Manager sa Home and Fashion Dept., Alturas Supermaket Corp., ni Marlito C. Uy; General Manager sa Alturas Supermarket Corporation, ni DTI region 7 Director Asteria C. Caberte, Maria Soledad L. Balistoy kinsa maoy OIC Provl. Director, DTI alang sa opisyal nga katukoran sa OTOP Hub. 

Ang paglagdaay, gisaksihan usab nila ni Marrietta S. Gasatan, PR Officer sa Alturas Supermarket Corp., ug Vierna Teresa C. Ligan, sa DTI – Bohol. 

Nalipay kita og dako kay sa katapusan, may permanente na gayud kita nga luna nga ikapakita ang atong mga produkto, ug basin ra nga mahimo na usab nga regular ang atong kita, mahinamon nga butyag sa usa ka tighimo og basket nga taga Antequera. 

Kaniadto, gawas sa matag tuig nga products showcase, talagsa ra nga ang mga may produkto sa OTOP maka-apil sa mga trade fairs, dala na usab sa gasto ug sa kahasul nga magdalag produkto gawas sa Bohol. 

Matud pa sa DTI, ang bag-ong luna sa OTOP Hub nga ipahiluna sa Island City Mall dinhi sa Tagbilaran City, Bohol, igo lang usab gayud tungod kay ang Island City Mall nasentro sa ekonomikanhong pag-ugmad sa iyang lokasyon nga duol sa Tagbilaran Central Public Market ug sa Integrated Bus Terminal, ang abtanan sa mga tawo sa 47 ka lungsod sa Bohol. 

Igo lang, matud pa sa DTI tungod kay ang Mall magpatapok sa libo-an ka katawhan matag adlaw, ug magpa-aghat usab sa mga turista nga mangita og mga pasalubong sa ilang pag-uli. (rahc/PIA7/Bohol uban sa taho ni VLigan/DTI) 

Gilagdaan tali sa DTI pinaagi ni DTI-7 RD Asteria Caberte ug Marlito Uy, general manager sa Alturas Group of Companies Incorporated ang kasabutan kabahin sa paghatag og luna sa OTOP didto sa ICM. (DTIBohol)