Bohol mihatag og mga ekipo 

Panguma sa senior hi-school 

TAGBILARAN CITY, Bohol, July 1 (PIA)—Unom ka hand tractors, 10 ka cultivators ug lain nga 10 ka shredder ang gitunol sa Kapitolyo pinaagi ni Gobernador Edgar Chatto ngadto sa Department of Education (DepED) sa Bohol Division aron magamit sa ilang mga senior high schools. 

Gipundohan sa Special Education Fund sa Kapitolyo, ang mga kahimanan sa panguma, ipang-apud apod sa mga tunghaan sa Bohol nga nagatanyag og special senior high school alang sa agriculture. 

Ang pagtugyan nahitabo uban sa tabang sa Asia Foundation nga may katali-an sa Australian Embassy sa proyekto nga Coalition for Change, pasabut ni Vera Gesite, ang coordinator sa Coalition for Change. 

Kahinumduman nga human itanyag sa DepED ang senior high school, naningkamot ang Coalition for Change nga makatabang sa pagmugna sa curriculum pinaagi usab sa pagbansay sa mga magtutudlo kinsa walay espesyal nga katakus, kahibawo ug tukmang kasinati-an sa pagtudlo sa mga kurso. 

Dinhi sa Bohol, subay sa panglangtaw sa katawhan, giduso nagdto sa DepED ang pag-tanyag sa senior high school for tourism ug senior high school for agriculture. 

Kini, subay sa panglantaw sa Bohol nga mamahimong numero uno nga sentro sa eco-cultural tourism ug may timbang nga kusog nga agro industry. 

Ug sanglit may maayo nga kapili-an nga panarbaho-an sa turismo ug agrikultura, naglaum ang mga tinugyanan nga ikaduso ang epektibo nga bansay sa mga kabataan sa senior high school subay sa mga panginahanglan, pasabut ni Gesite. 

Tungod niini, pinaagi sa Asia Foundation, namugna ang mga lig-on nga alayonay sa mga tiglihok sa industriya sa hotel ug restaurant, sa mga local nga kagamhanan ug sa nasudnong kagamhanan aron makatabang sa dinali-an nga pagbansay sa mga magtutudlo aron makamao na unya motudlo sa mga kurso nga gi-andam. 

Sa agrikultura, ang mga kagamitan nga gihatag, dako og tabang aron makasuway ang mga magtutuon sa paggunit ug sa pag-operate sa mekanikal nga mga makina sa panguma, pasabut ni Dr. Nimfa Bongo, schools division superintendent. 

Dugang ni Dr. Bongo, kinsa bag-o pa lamang milingkod sa Division Office sa Bohol, ang donasyon makatabang sa pag-init sa mga magtutudlo sa pagpamatuod sa ilang mga paningkamot aron ang mga mabansay, dali rang makasulod sa trabaho, mas sayon nga molahus sa kolehiyo o ma-aghat na dayon sa pagsugod og mga negosyo subay niini. 

Kahinumduman nga gihimo nga pilot sa agricultural senior high school ang San Pascual National Agricultural High School sa Ubay samtang ang Lourdes High School sa Panglao mao usab ang pilot school sa tourism senior high school. 

Us aka P4M nga mini restaurant nga may kompleto nga mga gamit ug lain nga P5M nga mini hotel ang gihatag usab sa Bohol aron mahimong lugar bansayan sa mga estudyante didto sulod sa Lourdes High School. (rahc/PIA-7//Bohol) 

Gitunol ni Gob Edgar Chatto ang mga ekipo sa panguma nga magamit sa mga estudyante sa senior high school didto sa mga pilot schools for agriculture sama sa San Pascua lug pipila pa ka mga tunghaan sa Bohol. Ang donasyon, aron pagseguro nga dili mabag-ohan ang mga kabataan sa pag-operate sa mga ekipo. (rahc/PIA-7/Bohol)