Duterte ngadto kang Villar: 

ipasabot sa katawhan ang re-blocking 

TAGBILARAN CITY, July 2 (PIA)--Giseguro ni Presidente Rodrigo Roa Duterte sa katawhan sa Bohol ang pagpasabot kalabot sa nagpadayong re-blocking projects sa Department of Public Works and Highways (DPWH) dinhi sa lalawigan. 

Kini human nakadawat ang presidente og mga reklamo gikan sa lokal nga mga opisyal atol sa iyang pagbisita sa Bohol niadtong Huwebes nga gipangguba ang ilang mga karsada sa DPWH bisan og maayo pa ang kondisyon ug wa usab sila konsultaha. 

“I will ask DPWH Secretary Villar to come over and explain to the people. Anyway, it's the people's money. They deserve rather an explanation from the government. (Akong manduan si DPWH Kalihim Villar sa pag-ari ug e-esplikar ngadto sa katawhan. Total, kwarta kana sa katawhan. Kinahanglan hinuon nila ang eksplanasyon gikan sa gobyerno),” tubag sa Presidente sa media sa dihang gipangutana siya kalabot niining isyu. 

Giangkon sa Presidente nga dili siya teknikal nga pagkatawo nga makapasabot kalabot sa proyekto sa kadalanan. 

“I am not a technical person --- pero ang pagka-alam ko kasi, 'yung iba, kadtong na-linog, linog ma'y tawag sa ato,,,gibungkag gyud nila. 

Si Duterte maoy pinasidunggang dinapit sa ika-25 nga Annual National Convention sa Vice Mayor’s League of the Philippines (VMLP) niadtong Hunyo 28 nga gipahigayon sa Bellevue Resort sa lungsod sa Panglao. 

Si Duterte niabot mga alas 4 sa hapon kauban ni Special Assistant to the President Kalihim Christopher “Bong” Go, Kalihim Francis Tolentino sa Office of the Political Adviser ug Presidential Assistant for the Visayas Michael Lloyd Lee Dino. 

Gitagbo sila nilang Gob. Edgar Chatto, VMLP-President Donnabel Joy Mejia, Convention Director Jose Antonio Veloso, First District Rep. Rene Relampagos, Second District Rep. Erico Aumentado, Third District Rep. Arthur Yap, Tagbilaran City Mayor John Geesnell Yap II, Dauis Mayor Marietta Sumaylo ug Panglao Mayor Pedro Fuertes. 

Tungod niini, gipaabot sa katawhang Bol-anon ang pagbisita diri ni Villar aron mosusi ug mopasabot sa mga gipanggubang karsada sa pipila ka mga lungsod dinhi sa Bohol tungod sa road re-blocking projects sa DPWH. (ecb/PIA7-Bohol) 

Si Presidente Rodrigo Roa Duterte nitubag sa pangutanan sa media kalabot sa road re-blocking projects sa DPWH dinhi sa lalawigan atol sa ika-25 nga tinuig nga nasudnong convention sa Vice Mayor’s League of the Philippines (VMLP) nga gipahigayon didto sa Bellevue Pavilion, lungsod sa Panglao niadtong Hunyo 28, 2018. (ecb/PIA7-Bohol)