P7.7 B commodity invest plan sa 

balanghoy papundohan sa RDC 

TAGBILARAN CITY, July 12 (PIA)—Giduso na sa Regional Development Council sa Central Visayas ang hangyo sa Bohol nga kahatagan og dako nga pundo aron ibubo pagpatambok sa industriya sa balanghoy o kamoteng kahoy dinhi. 

Ang hangyo sap undo pag-ugmad sa balanghoy, mokabat sa P7.7 bilyones ug molanat kini sa tulo ka tuig ang giduso usab sa RDC ngadto sa Department of Agriculture (DA) himan kini ikasukip sa Regional Development Investment Plan. 

Ang pundo nga gikinahanglan, segun pa sa secretariat sa RDC, nagrepresentar sa tumbok nga mga proyekto ug programa sa pag-asnat sa ekonomikanhong kahimtang sa katawhan sa Central Visayas. 

Matud sa RDI, ang Provincial Commodity Investment Plan (PCIP), nihaum lang usab sa mga tumong sa Regional Development Plan sa pagpalapad ug pagpadaghan sa mga kahigayunan nga makapamuhunan sa pagpanguma. 

Kahinumduman nga niadto pang Disyembre 11, 2017 sa tigum sa Bohol Provincial Development Council una nga giduso sa PDC ang PCIP alang sa bolanghoy sa sugyot nga iapil na kini sa Regional Development investment Plan (RDIP) aron mapahatan og pundo. 

Segun pa sa PDC, ang bolanghoy usa sa mga 10 ka commodities nga gitumbok nga unang hatagan og pagtagad sa Philippine Rural Development Project (PRDP) sa DA, proyekto nga gipundohan usab sa World Bank ug gipatuman sa DA. 

Ang PCIP sa balanghoy naglangkob sa tulo ka tuig nga sugyot-tinabangay sa kagamhanan nga Probinsyal ug sa DA ug niini, maglatag sa mga angayan nga tabang nga ikatag nagdto sa nagkadaiya nga value chain sa balanghoy. 

Kini, matud pa, maoy mahimo nga basihanan ug kapasikaran sa PRDP alang sa mga proyektong pundohan niini aron tubagon ang mga panginahanglan sa mga nagkadaiyang naglihok sa pagproseso sa bolanghoy. (rahc/PIA-7/Bohol) 

DILI NA GIBANGKONG! Ang kagamhanan karon mibangko sa balanghoy isip maayo nga produkto nga panguma, ngani, magpapundo og binilyon aron ugmaron ang industriya sa pangbalanghoy, segun sa RDC. (PIABohol)