Pilipinas, may “social security” nga 

katali-an na sab, sa Japan, Aleman 

TAGBILARAN CITY, July 11 (PIA)—Napun-an na og duha ka nasud nga may Overseas Filipino Workers (OFWs) ang may napanindot nga Social Security Agreements (SSA), sa pagpanglimbasug sa Social Security System. 

Nahipno na usab ang SSA sa nasud nga Germany sugod Hunyo 1 ug sa Japan sugod Agosto 1 pohon. 

Kini nga lakang magseguro sa pagpanalipod sa mga katungod sa social security sa kapin sa 230,000 ka Pinoy nga tua didto nanginabuhi sa nahisgutan nga duh aka dugang mga nasud. 

Sa kinatibuk-an, ang Pilipinas may 13 na ka bilateral SSAs tali sa Austria, UK ug Northern Ireland, Spain, France, Canada, Quebec, Netherlands, Switzerland, Belgium, Denmark, Portugal, Germany ug Japan. 

Gibutyag ni SSS President ug Chief Executive Officer Emmanuel F. Dooc nga ang bilateral nga SSAs, gitumong aron makubsan ug gani, dili na kwentahon pa ang nationality-ug territory-based restrictions sa social security. 

Kini magtabang sa gibanabana nga 47,214 ka Pinoy sa Germany ug 182,917 ka Pinoy sa Japan, kinsa nanginabuhi o nanimuyo niining duha ka mga nahisgutang nasud. 

Ang SSAs magduso sa katungod sa mga membro sa mga programa sa social security sa hain man nga nasud aron makatagamtam sa hamugaway nga retirement, disability ug hinabang sa panahon sa kamatayon. 

Ang pagpahiluna sa SSA nalatid na sa 1962 International Labor Organization (ILO) Social Security Convention No. 118 kabahin sa Equality of Treatment ug ang 1982 ILO Social Security Convention No. 157 sa pagmintinar sa mga katungod sa Social Security. 

Giingon nga may upat ka mahinongdanon nga features ang SSA: (1) ka-angayan sa pagtratar, (2) benepisyo sa pag-export, (3) paghiusa sa insurance periods, ug (4) administratibo nga tinabangay. 

Matud ni Dooc, karon nga napahiluna na ang SSA sa duha ka nasud, ang mga Pinoy didto makatagamtam na sa social security benefits sa susamang kondisyones nga gigamit sa mga Aleman ug mga Hapon. 

Ingon usab niini ang damgo sa SSS alang sa tanan’g Pinoy nga naa nanimuyo na o nanginabuhi sa ubang mga nasud. 

Pinaagi sa benepisyo sa pag-export, makadawat gihapon ang usa ka sakop sa SSS sa social security benefits bisan pa’g hain man sila mopili nga manimuyo: sa langyaw nga nasud, o sa Pilipinas. 

Sa paghiusa sa insurance periods, matugotan na ang pagsumpay sa mga kontribusyon nga napundar sa membro bisan diin man siya nga nasud, aron makaabut sa tukmang kondisyon nga makahimo na sa iyang minimum qualifying contribution aron makapensyon bisan sa hain man siya nga nasud moretiro. 

Ilawom sa Philippine Social Security Law, kinahanglang mokompleto ang sakop sa SSS sa labing menos 120 ka binuwan nga kontribusyon aron makadawat sa benepisyo. Kadto lamang sakop nga nakakompleto sa 100 ka binuwan nga hatagan, ang makadawat sa lump-sum sa kinatibuk-ang kontribusyon, pun-an sa interest. 

“Kon wala pa ang probisyon sa paghiusa sa insurance periods, kadtong sakop sa SSS, dili mahatagan sa retirement pension kon 100 ra ka binuwan nga hatagan sa binuwan nga kontribusyon. 

Karon, ubos sa social security nga sistema nga nahipno, mahimo na nga makapensyon bisag 20 o subra’g dyutay sa 20 ka binuwan nga hulogan sa creditable periods ang napundo, pasabut ni Dooc. 

Ang SSAs ipatuman sa mga liaison agencies: ang SSS ug Government Service Insurance System (GSIS) sa Pilipinas, sa Deutsche Rentenversicherung sa Germany ug sa Japan Pension Service alang sa Japan, aron mas sayun na ang tinabangay sa matag nasud. 

Ang SSS, uban sa Department of Foreign Affairs (DFA), Department of Labor and Employment (DOLE) ug uban nga social security institutions, magpadayon sa paghipno sa mga SSAs sa uban pang mga nasud aron ikaduso ang kaayohan sa mga overseas Filipinos ug pagseguro sa ilang social security protection sa panahon sa kalisud, pasalig ni Dooc. 

Kinatibuk-an nga 1.34 ka milyon ka OFWs ang makatagamtan niining kaayohan, segun pa sa SSS. (rahc/PIA-7/Bohol)