Puli-panginabuhi-an unahon sa

Dili pa undangon ang jueteng

BELLEVUE PAVILION, Panglao, Bohol, June 28 (PIA)—“Kay sa undangon ang jueteng unya, mobalhin ang mga tawo sa illegal nga drugas,” gibutyag ni Presidente Rodrigo Duterte nga, “may panahon ra ang tanan.”

Atul sa media interview dihang mitambong ang pangulo sa nasud didto sa ika 25 nga Annual National convention sa Vce Mayors’ League of the Philippines (VMLP) dinhi sa Panglao, Hunyo 28, gipasabut sa president nga iyang aksyonan ang [pagpa-undang sa] jueteng, apan sa tukma nga panahon.

“Wala ko mag-ingon nga dili na nako aksyonan. Ako nang himoon [undangon ang jueteng], apan nakahibaw kita unsa ang kakuyaw nga mahitabo kon undangon nato [karon] ang jueteng, nga wala kita’y ikatanyag nga puli nga kapanginabuhi-an, dason sa Presidente didto sa pagnagtapok.

Ang jueteng, wala usab mapaundang bisan pa sa mga nag-una nga administrasyon.

Gipahinumdon ni Presidente Duterte, “illegal gayud sa balaod ang jueteng.”

“Ingon ani ni, ang jueteng, supak sa balaod, dili kini legal. Dili kini ikatugot.” (Di ganito, jueteng is unlawful. It is not legal. It cannot be allowed), padayag sa Presidente, kinsa nakabantay na lang nga gibikil kanunay sa iyang mga tigsaway.

Matud niya, kusog ang jueteng sa Luzon, ug sa Visayas apan wala kini sa Mindanao, ilabi na sa Davao.

Ingon pa ni Presidente Duterte, ang jueteng ang labing maayo nga paagi sa networking, tungod kay kini may lapad ug lawom nga network.

Subay sa pagpa-undang niini, matud niya, sayun ra’ng ipatawag ang mga operator niini sa Malakanyang, aron sultihan nga ipa-undang. Apan, dugang niya, kinahanglan kini sa saktong panahon.

“Kaila man ‘ta kun kinsa ni sila. Ako silang ipatawag og papili-an nako sila, mag-away ta? O moundang mo?, sulti ni Duterte as media ug sa mga bise mayor nga namati usab sa interview.

“Di ba, niingon ko, may sakto’ng panahon alang sa tanan? Panahon manugal, panahon nga mahimong drug lord, ug panahon nga putlon na ang pagkinuwanggol?” pahinumdom sa Presidente ngadto sa mga sakop sa media nga nakabati nga iya na una’ng gipili ang pagpakahilum batok sa simbahan nga aktibo na nga nanghilabot sa pagpadagan sa kagamhanan, kay sa ipadayon ang away.

“Karon, kon akoa na nga paundangon [ang jueteng], kinahanglang may ikatanyag kita nga ikapuli nga kapanginabuhi-an sa mga tawo,” rason niya.

Dayon, sumpay ni Duterte, “Kon wala kita’y ikatanyag nga ipuli nga panginabuhi-an, ang mopuli sa jueteng, drugas, mas delikado. Mas lisud na, kay mas lapad ug mas lawom na ang network nila.”

“Ang mopuli niana, mga drug lord. Mosakay ra na sila sa mekanismo sa jueteng,” padayon pa niya.

“Mao, nga kinahanglang preparado kita nga mohatag og ikapuli [nga kapanginabuhi-an],” paneguro sa Presidente, kinsa nakit-an na nga ang tanan niyang gibuhat, planado aron ilhon kon kinsa gayud ang mga matuod nga mituo sa kausaban nga iyang gikampanya sa nasud.

“Ato pa’ng gipangitaan og paagi, diin ‘ta mokuha og kwarta, unsaon nato pagbahin-bahin ang atong dyutay nga kwarta aron makahatag kita og inadlaw nga panginabuhi-an sa tanan,” pasabut ni Duterte.

Human sa interview sa Presidente, may mga sakop sa media nga mipadangat sa balita, nga dili buot sa Presidente nga undangon ang jueteng. (rahc/PIA-7/Bohol)

Kon undangon ang jueteng ug wala’y gitanyag nga kapanginabuhi-an, daghang mobalhin sa illegal nga drugas, matud ni Presidente Rodrigo Duterte, didto sa Panglao. Buot niya nga mangita una og ikatanyag nga kabalhinan aron mabuhi sa inadlaw-adlaw ang mga nagjueteng kanhi, sa dili pa biyaan ug maglutaw na hinuon sa wala. (Nieto Calope Jr./PIA-7/Bohol)