Balaod alang sa mas luwas nga trabahoan, 

gilagdaan na ni Duterte 

TAGBILARAN CITY, Aug. 22 (PIA)--Gilagdaan na ni Presidente Rodrigo Duterte ang Republic Act No. 11058 o An Act Strengthening Compliance With Occupational Safety and Health Standards and Providing Penalties for Violations. 

Kining balaod nga gitawag og “Villanueva Law” gisulat ni Senador Joel Villanueva ug nagtinguhang magbaton og mas luwas ug maayong “workplace” ang mga trabahanteng Pilipino. 

Pipila sa mga probisyon niining balaod nga gilagdaan ni Duterte niadtong Agosto 17 mao nga angay siguradohon sa mga employer, contractor ug sub-contractor o mga nagdumala sa mga trabaho nga mahatagan ang ilang mga trabahante og luwas nga pagtrabahong layo sa bisan unsang posibleng makamatay nga butang, hinungdan sa sakit ug makaingon og physical injury. 

Nakalatid sa maong balaod nga kun aduna may peligro sa gi-trabahoan sa mga trabahante, angay ipabihalo kanila ug ipaubos sa mga gikinahanglang pagbansay. 

May katungod usab ang mga trabahante nga balibaran ang bisan unsang trabaho nga kun makita sa Department of Labor and Employment (DOLE) nga dili kini luwas ug wala nakasunod sa mga gitakdang sumbanan aron masiguro nga dili kini delikado sa mga trabahante. 

Pahamtangan og multang salapi nga dili mosaka sa P100,000 matag adlaw ang contractor o subcontractor hangtod masakto ang bisan unsang paglapas o wala pagsunod sa Occupational Safety and Health Standards diin sugdan ang pag-ihap sa adlaw sa oras nga madawat sa contractor o subcontractor ang ‘notice of violation’. 

Ubos ning bag-ong balaod, gilauman nga malikayan na ang pagkamatay ug pagkasakit sa mga trabahante. (ecb/PIA7-Bohol)